Սուրեն Օհանջանյանն ու իր կինը` Գոհար Սարգսյանն, ամեն հինգշաբթի մասնակցում են ՀՀ կառավարության շենքի դիմաց կազմակերպվող բողոքի ակցիաներին: Նրանց որդին` Տիգրան Օհանջանյանը, զոհվել էր 2007 թ. օգոստոսի 30-ին Հայաստանի զորամասերից մեկում: Ըստ քրեական գործի նյութերի`Տիգրան Օհանջանյանը, էլեկտրահարվել էր, սակայն զոհված զինծառայողի հարազատները համոզված են, որ նրան սպանել են: Սուրեն Օհանջանյանն ու Գոհար Սարգսյանը երեք տարի շարունակ պայքարում են, որպեսզի բացահայտվեն իրենց որդու սպանության հանգամանքները: Այս տարվա հունվարի 13-ին Գեղարքունիքի մարզի ընդհանուր իրավասության դատարանն արդարացրեց երկու ամբաստանյալներին` կապիտան Ռուստամ Ասատրյանին և կրտսեր սերժանտ Կարեն Թովմասյանին, որոնք մեղադրվում էին քրեական գործով: Նրանց մեղադրանք էր առաջադրվել ՀՀ քրեական օրենսգրքի 376 հոդվածի 2-րդ մասով (անփութություն): Դատախազ Հարություն Հարությունյանը դատարանից պահանջել էր Ռուստամ Ասատրյանին դատապարտել դատապարտել 3,6 տարի ազատազրկման, իսկ Կարեն Թովմասյանին` 3 տարի ազատազրկման: Դատարանը չգտավ նրանց մեղքը հաստատող բավարար ապացույցներ: Սրանից հետո զինդատախազ Արմեն Խաչատրյանը դիմել է ՀՀ քրեական և զինվորական գործերով վերաքննիչ դատարան և բողոքարկել դատավճիռը: Սուրեն Օհանջանյանը «Առաջին լրատվականին» տեղեկացրեց, որ այս տարվա սեպտեմբերի տասին Առողջապահության նախարարությունը ստեղծել է հանձնաժողով, որը պետք է զբաղվեր իր որդու` Տիգրանի մահվան հանգամանքները ուսումնասիրելով, քանի որ կա երկու հակասական եզրակացություն: Չնայած մի քանի ամսվա գործունեությանը, պարզվում է, որ այդ հանձնաժողովը մինչ օրս ոչինչ չի բացահայտել:
(Տիգրան Օհանջանյանի մայրը` նկարում աջից)