Ադրբեջանական Trend լրատվական գործակալությունը, վկայակոչելով իրանական ISNA լրատվական գործակալությունը, հայտնում է, որ Իրանի պաշտպանության նախարար Ահմեդ Վահիդին այսօր տեղի ունեցած ռազմական շքերթի ժամանակ անդրադարձել է Թուրքիայի տարածքում տեղակայվելիք ՆԱՏՕ-ի ռադիոտեղորոշիչ կայանի (ՌՏԿ) խնդրին.
«Թուրքիայում ՆԱՏՕ-ի հակահրթիռային պաշտպանության համակարգի տարրերի տեղակայումն անհրաժեշտ է Իսրայելի պաշտպանության համար։ Տարածաշրջանի երկրներից ոչ ոք որևէ կերպ չի սպառնում Եվրոպային, դրա համար էլ որևէ անհրաժեշտություն չկար Թուրքիայի տարածքում ՌՏԿ տեղակայելու համար։
Արևմտյան երկրները նշում են, թե այդ հրթիռային համակարգերը տեղակայվում են Եվրոպայի պաշտպանության համար։ Սակայն եվրոպական երկրները երբեք տարածաշրջանի երկրներից բխող սպառնալիքի մասին պաշտոնական հայտարարությամբ չեն դիմել ԱՄՆ-ին, որպեսզի նա այդ համակարգերի տեղակայմամբ պաշտպանի իրենց։
Թուրքիայի տարածքում ՌՏԿ-ի տեղակայումն անհրաժեշտ է Իրանի ու Ռուսաստանի պետական հզորության սահմանափակման համար»։
Հիշեցնենք, որ թուրքական տարածքում ՆԱՏՕ-ի ՌՏԿ-ի տեղակայման մասին հուշագիրը Թուրքիան և ԱՄՆ-ն ստորագրել են սեպտեմբերի 14-ին Անկարայում։ Թուրքիայի կողմից հուշագիրը ստորագրել է արտգործնախարարի խորհրդական Ֆերիդուն Սինիրլիօղլուն, իսկ ԱՄՆ կողմից՝ դեսպան Ֆրենսիս Ռիկարդոնեն։
Ըստ դրա՝ ամերիկյան ռադարը տեղակայվելու է Թուրքիայի արևելյան հատվածում ընկած Մալաթիայի նահանգի Քյուրեջիք վայրում, որը գտնվում է իրանական սահմանից 540 կիլոմետր հեռավորության վրա։
