Գյուղատնտեսական գիտությունների թեկնածու Գառնիկ Պետրոսյանն «Առաջին լրատվականի» հետ զրույցում, դրական գնահատելով Ռուսաստանից Հայաստան բարձրորակ «էլիտա» ցորենի սերմնացուի ներկրումը, շեշտեց, որ պետք է մեր երկրում զարգացնել սերմնաբուծությունը, տնկարաններ հիմնադրել և բազմացում կատարել:
«Միայն առաջին վերարտադրությունով սահմանափակվելը բավարար չէ: Սերմնաբուծությունը պետք է տեղում զարգացնել: Որոշ քայլեր արվում են, հուսով եմ, դրական արդյունք կտան: Մենք չենք կարող անընդհատ ներմուծել, դա կազդի գների վրա: Ճիշտ կլինի սուպերէլիտային և էլիտային սորտեր ստանան ու տեղում վաճառեն գյուղացիներին»,- ասաց Գ.Պետրոսյանը՝ հավելելով, որ անցած տարի բերված 7 սորտերը լավ քննություն բռնեցին ու արդյունք տվեցին, հատկապես՝ Օկտանիա, Կարսնոդարի 99 սորտերը:
Անդրադառնալով գյուղացիների բողոքներին՝ Գ.Պետրոսյանը նկատեց, թե գյուղացիները հաճախ են առանց պատճառի բողոքում ու պատրվակ են փորձում գտնել, որպեսզի չվերադարձնեն սերմը. «Այդ սովորությունը միշտ եղել է: 1995-1998 թթ.-ին կառավարությունը նույնպես գումարներ հատկացրեց գյուղացիների համար տարբեր կարգի սերմեր բերելու և բաժանելու համար, բայց մեծ մասը չեն վերադարձրել: Հիմա շատ խիստ պահանջում են և սերմերի հետվերադարձը ապահովում են: Ինչքանո՞վ կհաջողվի՝ չգիտեմ»:
