Մեր երազանքը Հայաստանը առանց արտագաղթի տեսնելն է: Այսօր «Առաջին լրատվական»-ի հետ զրույցում նման ցանկություն հայտնեց լիբանանահայ բազմավաստակ բանասեր, խմբագիր, հասարակական և կրթական գործիչ Ժիրայր Դանիելյանը` խոսելով ՀՀ 20-ամյա անկախության մասին: Նա նշեց, որ Հայաստանի անկախությունը, որ ծնունդ առավ 1991 թ. սեպտեմբերի 21-ին, խանդավառեց ամբողջ Սփյուռքը և հայությունը: «Ցավով պետք է ասեմ, որ այդ խանդավառությունը հետզհետե նահանջեց, սակայն այսօր՝ 20 տարի հետո, կարող եմ ասել, որ նորաստեղծ մեր անկախությունը, մեր նոր պետականությունը ոտքը ամուր դրել է հողի վրա և հայրենի հողից է իր սնունդը ստանում, դա շատ կարևոր է, և հողի վրա ապրելը ոչ միայն բախտավորություն է, այլև կենսական անհրաժեշտություն»,- ասաց սփյուռքահայ գործիչը:
Մեր այն հարցին, թե ինչու՞ անկախության առաջին տարիների խանդավառությունը մարեց, նա պատասխանեց, որ, ըստ երևույթին, տնտեսական, հասարակական դժվարությունները, և նաև քաղաքականությունը պատճառ դարձան: Ժ. Դանիելյանը շարունակեց՝ ասելով, որ անկախության տարիներին 2 ցավալի կորուստ ունեցանք` մարդկային կորուստներ` Արցախի ազատագրության համար մղվող պայքարում զոհված երիտասարդները և արտագաղթը: «Որքան դժվարությունները մեզ նահանջի մատնեն, մենք պետք է իմանանք, որ պետք է քաջությամբ դիմագրավենք այդ դժվարությունները, հայրենի հողը անփոխարինելի է, հուսամ, որ տնտեսապես կբարգավաճի մեր երկիրը, այնպիսի բարգավաճում լինի, որ արտագաղթը նվազի, և մեր բառարաններից դուրս գա արտագաղթ բառը»,- մաղթեց լիբանանահայ գործիչը` չմոռանալով նաև անկախության տարիներին հայ ժողովրդի ձեռքբերումների մասին:
