Տոնական օրով մի տեսակ չի ստացվում բացասական բաների մասին գրել, բացասական գրել, քննադատել և այլն, բայց, ինչպես ցույց տվեց Հայաստանի տոնական օրվա կազմակերպումը, հնարավոր չէ այդ մասին լռել անգամ այդ ժամանակ, որովհետև տոն կազմակերպող իշխանությունը, ճոխություն ու հրավառություն լցնելով հասարակության աչքերին, իրականում մյուս կողմից նաև պարտադրում է հանրությանը որևէ այլ բանով չզբաղվել: Դրա վկայություն էին Հանրապետության հրապարակում զորահանդեսին ռուսական դրոշով ռուսական զորքի մասնակցության դեմ բողոքի մասնակիցներին ոստիկանություն բերման ենթարկելն ու այն, ինչ ԱԱԾ ու ոստիկանության աշխատակիցներն արել են զոհված զինծառայողների մայրերի և հարազատների հանդեպ, որոնք, ըստ էության, դեռ չեն էլ հասցրել իրենց բողոքը արտահայտել:
Փաստորեն, անկախության օրը, դրանից առաջ և հաստատ նաև դրանից ինչ-որ ժամանակ հետո պաթետիկ ելույթներ ունեցող իշխանությունը, անկախության և ազատության մասին բարձրաձայնող իշխանությունն իրականում անգամ անկախության օրը թույլ չի տալիս, որ քաղաքացիները ազատորեն արտահայտեն իրենց վերաբերմունքը այս կամ այն հարցի հանդեպ, ներկայացնեն անկախության մասին իրենց պատկերացումները, բարձրաձայնեն անկախ Հայաստանում իրենց անտեսված խնդիրները: Իրականում տոնը փչացնում է հենց իշխանությունը, ոչ միայն իր առօրյա գործունեության անարդյունավետությամբ, ամենաթողությամբ, այլ նաև տոնական օրերին էլ քաղաքացիներին պարտադրվող վարքուբարքով: Այդ երկու՝ փոքր թվացող դրվագներն իրականում, ըստ էության, վկայում են Հայաստանում մի մեծ խնդրի մասին` Հայաստանը Հայաստանի քաղաքացիների պետությունը չէ, ներկայիս Հայաստանն իշխանապետություն է, որի պարագլուխները Հայաստանը նույնացրել են իրենց հետ ու իրենց պաշտպանելով, իրենց հանգիստը պաշտպանելով՝ համարում են կամ ներկայացնում են այնպես, թե իբր Հայաստանն ու Հայաստանի քաղաքացիների տոնն են պաշտպանում:
Այս վտանգավոր նույնականացումը, որ կատարվում է նաև քարոզչական հնարավոր հնարքների լայն կիրառմամբ, իրականում կարող է ունենալ շատ հեռուն տանող ու ծանր հետևանքներ: Հետևաբար, Հայաստանի քաղաքացիները ստիպված են անկախության տոնին ուրախալ, բայց նաև անպայման մտածել, մտածել իրական անկախության, քաղաքացիական անկախության միջոցով անկախ պետություն ձևավորելու համար նպատակաուղղված ու համատեղ ջանքերի մասին:
