Այսօր անկախության տոնին նվիրված շքերթի ժամանակ կառավարության շենքի դիմաց, բազմահազար ժողովրդի առաջ ոստիկանները բռնի ուժ կիրառեցին նախկին քաղբանտարկյալ, ՀԱԿ ակտիվիստ Վարդգես Գասպարիի նկատմամբ:
Ինչպես «Առաջին լրատվական»-ի հետ զրույցում նշեց Գասպարին, ինքը և բանակում զոհված զինծառայողների մի քանի ծնողներ կառավարության շենքի դիմաց հայկական բանակում տեղի ունեցած մի շարք սպանությունների դեմ պաստառներով իրենց բողոքն են արտահայտել, սակայն շուտով ոստիկանները բռնի ուժով նրանց ձեռքից վերցրել են պաստառները, որից հետո Գասպարին նույն տեղում պառկել է գետնին:
Մեր տեսախցիկը ֆիքսեց` ինչպես են կարմիր բերետավորները ՀԱԿ ակտիվիստին բռնի ուժով վերցնում կառավարության շենքի դիմացից և տանում Վերնիսաժին հարակից այգում թողնում:
Ի դեպ, կարմիր բերետավորները ամեն կերպ խոչընդոտում էին նաև մեր աշխատանքին, և «Առաջին լրատվական»-ի լրագրողը մեծ դժվարությամբ տեսախցիկը հասցրեց խմբագրություն:
