Թուրքական Zaman թերթի փոխանցմամբ՝ Նյու Յորքում հանդիպել են Թուրքիայի վարչապետ Ռեջեփ Թայիփ Էրդողանը և ԱՄՆ նախագահ Բարաք Օբաման։ Հանդիպմանը ներկա են գտնվել նաև Թուրքիայի փոխվարչապետ Ալի Բաբաջանը, արտգործնախարար Ահմեդ Դավութօղլուն, ԵՄ-ի ինտեգրման գծով նախարար և ԵՄ-ի անդամակցության գծով գլխավոր բանագնաց Էգեմեն Բաղըշը, ԱՄՆ-ում Թուրքիայի դեսպան Նամըք Թանը, ինչպես նաև ԱՄՆ պետքարտուղար Հիլարի Քլինթոնը։
Հանդիպման ժամանակ կողմերի քննարկման հիմնական թեմաներից մեկը եղել է ահաբեկչության դեմ պայքարը։ Օբաման դատապարտել է երեկ Անկարայում տեղի ունեցած ահաբեկչությունը, որի հետևանքով զոհվել է 3 և վիրավորվել 34 մարդ։ Էրդողանն էլ իր հերթին Օբամային հիշեցրել է, որ երեկ Քրդստանի աշխատավորական կուսակցությունը (PKK) Սիիրթում (սխալմամբ) սպանել է 4 կանանց։
Օբաման Էրդողանին շնորհակալություն է հայտնել Աֆղանստանի ու Լիբիայի հարցերում ցուցաբերած աջակցության համար։ Էրդողանն իր հերթին Օբամային իրազեկել է օրեր առաջ իր կատարած արաբական (Եգիպտոս, Թունիս, Լիբիա) շրջագայության մանրամասների մասին։
Բացի այդ, հանդիպման ժամանակ կողմերը քննարկել են մերձավորարևելյան խաղաղ գործընթացը, Սիրիայի և Իրաքի հարցերը, Թուրքիայում ՆԱՏՕ-ի ռադիոտեղորոշիչ կայանի տեղակայման հարցը, ինչպես նաև վերջին շրջանում բավական լարված թուրք-իսրայելական և թուրք-կիպրական հարաբերությունները։
