ՀՀ-ում Գերմանիայի արտակարգ և լիազոր դեսպան Հանս-Յոխեն Շմիդտն այսօր ՀՀ անկախության 20-ամյակի կապակցությամբ լրագրողների հետ հանդիպման ժամանակ նշեց, որ Գերմանիայի դաշնային հանրապետությունը հետաքրքրությամբ է հետևել ԽՍՀՄ-ի փլուզմանը և աջակցել է անկախացող պետություններին, ինչպես նաև շատ կարճ ժամանակահատված հետո դիվանագիտական հարաբերություններ հաստատել անկախ պետությունների հետ:
Դեսպանը նշեց, որ 20-ամյակի կապակցությամբ իր հղած շնորհավորական ուղերձում ինքը ցանկություն է հայտնել, որ Հայաստանի իշխանությունները գտնեն ԼՂ հարցի լուծման համար լավագույն ուղիները, ինչպես նաև գտնեն նորմալ ճանապարհներ հայ-թուրքական սահմանի բացման համար, որը, դեսպանի գնահատմամբ, սառը պատերազմի վերջին մնացորդներից է: Նա շեշտեց, որ սահմանի բացումը կարևոր է, քանզի ԵԱՀԿ անդամ բոլոր երկրները, այդ թվում` Թուրքիան, հռչակել են քաղաքական կամք ընդդեմ բոլոր տեսակի փակ սահմանների և կողմ են արտահայտվել բաց ապրանքաշրջանառությանը;
«Հարավկովկասյան բոլոր երկրների համար մեծագույն կարևորություն է ներկայացնում ԼՂ հակամարտության լուծումը և հայ-թուրքական սահմանի բացումը; Այս զարգացումները դրական ազդեցություն կունենան Հարավային կովկասում տնտեսական զարգացման համար և այս տարածքում ապրող ժողովուրդների բարօրության համար»,- մանրամասնեց դեսպանը` հավելելով, որ ԵՄ-ն և նրա անդամ Գերմանիան շահագրգռված են, որպեսզի առանց հակամարտությունների տեսնեն Հարավային Կովկասը:
Հանս-Յոխեն Շմիդտը նշեց, որ ԵՄ-ն շահագրգռված է տարածաշրջանի տնտեսական զարգացմամբ և, ըստ նրա, տնտեսական զարգացումն է, որ պետք է ազդի սոցիալական իրավիճակի բարելավման վրա, ինչն էլ կկասեցնի արտագաղթի հետ կապված վտանգը:
Նա նաև ընդգծեց, որ Գերմանիայի Դաշնային Հանրապետությունը ԼՂ հարցում որպես միջնորդ կողմ է Մինսկի խմբին` իր երեք համանախագահներով. «Անկախ այն հանգամանքից, որ ԼՂ հակամարտությունը մոտ ապագայում լուծվելիք խնդիր չէ, միևնույն է` ԵՄ-ն և Գերմանիան տարածաշրջանում շարունակում են իրենց քայլերը` այդ երկրներում քաղաքացիական հասարակության կայացման և տնտեսական համագործակցության ուղղությամբ»:
Դեսպանը նաև տեղեկացրեց, որ առաջիկայում Վարշավայում կայանալիք Արևելյան գործընկերության գագաթնաժողովի ընթացքում անդամ երկրների համար կնշվեն այն ուղղությունները, որոնք կբերեն նրանց հետ համագործակցության բարելավմանը, ինչպես նաև շեշտեց, որ հնարավոր է` ստորագրվի ամփոփիչ կոմյունիկե, որտեղ տեղ կգտնի վիզային ռեժիմի հեշտացման կետը:
«Եթե դուք հետաքրքրված եք գործընկերության պայմանագիր կնքելու, ապա պետք է իրականացնեք մեր կողմից առաջադրված պահանջները: Սա մեր կողմից բռնություն չէ, դուք ինքներդ եք կամք հայտնել համագործակցելու և պետք է շահագրգռված լինեք այդ պահանջների ամբողջական կատարմամբ»,- մանրամասնեց դեսպանը:
