Իրանական Raja News լրատվական կայքի հաղորդմամբ՝ ռուսական աղբյուրները հայտնում են, որ ՌԴ կառավարությունը մտադիր է Ահմադինեժադի Նյու Յորքայան 8-րդ այցելության ընթացքում Իրան-ԱՄՆ-ՌԴ եռակողմ հանդիպում կազմակերպել:
Raja News-ի փոխանցմամբ՝ այն երկրները, որոնք միջնորդության գործում իրենց դերակատարությունը կարևոր ու ազդեցիկ են համարում, մտադիր են հաշտեցնել Իրանին և ԱՄՆ-ին, իսկ այդ երկրների ցանկում է գտնվում նաև ՌԴ-ն, որը սովոր է Իրանի քարտով իր օգտին շահավետ ձեռքբերումներ արձանագրել:
Կայքի մատուցմամբ՝ ռուսական կողմը մտադիր է, հիշյալ եռակողմ հանդիպումը կազմակերպելով, հալեցնել Իրանի և ԱՄՆ-ի միջև գոյություն ունեցող սառույցը և այդկերպ միջազգային հարաբերությունների ոլորտում բարձրացնել իր դերակատարությունը:
Ինչպես արդեն տեղեկացրել էր «Առաջին լրատվականը», ԱՄՆ զինված ուժերի ընդհանուր շտաբի հրամանատար Մայք Մուլենը Իրանի և ԱՄՆ-ի միջև հարաբերությունների բացակայությունը վտանգավոր էր համարել միջազգային անվտանգության համար:
