Նոյեմբերյանում սեպտեմբերի 2-ին 17-ամյա աղջկա բռնաբարության դեպքի առթիվ քրեական գործ էր հարուցվել` ՀՀ քր.օր.-ի 138-րդ հոդվածի` բռնաբարություն, հատկանիշներով: Նշանակվել են մի շարք փորձաքննություններ, և ներկա պահին նախաքննությունը դեռ ընթանում է:
Երեկ մեզ հաջողվեց պարզել, որ գործը ինչ-ինչ պատճառներով Նոյեմբերյանի քննչական բաժանմունքից տեղափոխվել է Գեղարքունիքի քննչական բաժանմունք: Կարողացանք պարզել մի քանի մանրամասներ ևս, իսկ մինչ այդ հիշեցնենք, որ 17-ամյա Լ.Նասիբյանն ասել էր, որ «30 թվականի աղբյուր» կոչվող վայրում իրեն բռնաբարել են երեք 17-ամյա երիտասարդներ, որոնցից մեկը Նոյեմբերյանի քաղաքապետ Վանուշ Ամիրաղյանի որդին է, իսկ երկրորդը` 16-ամյա Նարեկ Հակոբյանն է: Սերգեյը Նոյեմբերյանի քաղաքապետ Վանուշ Ամիրաղյանի որդին է, իսկ Նարեկի հայրը աշխատում է ոստիկանության Նոյեմբերյանի բաժնում` որպես պրոֆիլակտիկայի ավագ տեսուչ, նա ոստիկանության մայոր է:
Ինչպես տեղեկացրել էինք, անչափահասի բռնաբարության դեպքի հետ կապված հարցաքննվել է Նոյեմբերյանի քաղաքապետ Վանուշ Ամիրաղյանի որդին, սակայն ներկա պահին կալանավորվածներ և ձերբակալվածներ չկան: Ավելին` սեպտեմբերի 7-ին աղջիկը գրավոր հայտարարություն է տվել այն մասին, որ իրեն չեն բռնաբարել: ՀՀ ոստիկանության հասարակայնության հետ կապերի վարչության աշխատակից Արմեն Մալխասյանը մեզ հետ զրույցում հաստատեց, որ գործը գտնվում է Գեղարքունիքի մարզի քննչական բաժնում: Իսկ միակ նորությունն այն է, որ աղջիկը մեղադրանքը հետ է վերցրել: Նոյեմբերյանի ոստիկանության քննչական բաժանմունքի պետ Գագիկ Նասիբյանը ևս հաստատեց, որ գործը տեղափոխել են Գեղարքունիքի քննչական բաժանմունք: Հարցին` ինչո՞ւ են տեղափոխել, պատասխանեց. «Դե քննչական գլխավոր վարչության ցուցումով տեղափոխել են: Մենք ուրիշ ոչ մի տեղեկություն չունենք: Միայն կարող եմ ասել, որ սեպտեմբերի 8-ին այդ գործը մեր մոտից տեղափոխել են: Ուղիղ տասը օր է: Իսկ թե ինչ ենք պարզել քննության ընթացքում մեզ մոտ, չեմ կարող ասել, քանի որ դա քննության գաղտնիության սկզբունքից է բխում»: Ի դեպ, նա հաստատում է նաև, որ իր և Լ.Նասիբյանի միջև բարեկամական կապեր չկան:
Նոյեմբերյանի քաղաքապետ Վանուշ Ամիրաղյանը մեզ հետ զրույցում հավաստիացրեց, որ դեռ ոչ մի տեղեկություն չունեն գործի ընթացքից. «Գիտեմ, որ գործը տեղափոխվել է Սևանի քննչական բաժանմունք, և այսօրվանից է սկսելու գործի քննության առաջին էտապը: Ինձ համար էլ է զարմանալի, թե ինչն է պատճառը, որ գործը տեղափոխվեց այնտեղ: Սակայն ասեմ, որ այդ աղջիկը իր մոր ներկայությամբ փաստել, գրել է, որ բռնաբարություն չի եղել, իսկ մայրն էլ տակը ստորագրել է: Մեր այն դիտարկմանը, թե շրջանառվող լուրերի համաձայն` մեղադրանքը հետ վերցնելու հանգամանքը պայմանավորված է նրանով, որ աղջկա հասցեին քաղաքապետի ընտանիքի կողմից սպառնալիքներ են հնչեցվել, քաղաքապետն ասաց. «Ոչ միայն իմ կողմից սպառնալիք չի հնչեցվել, այլև ընդհանրապես որևէ մեկի կողմից սպառնալիք չի հնչեցվել»: Իսկ այն հարցին, թե այդ դեպքում ինչո՞ւ է քաղաքապետի և նրա որդու անունը շրջանառվում, արդյո՞ք սա նրա դեմ ուղղված պատվեր է` շատ կարճ պատասխանեց. «Քննության ընթացքը ցույց կտա, և ժամանակը ամեն ինչ կպարզի: Իմ կանխատեսումները և ենթադրությունները հիմա չեմ ցանկանում ասել: Ճիշտ է, ունեմ անձնական կարծիք, բայց չեմ կարող բարձրաձայնել: Իրենք հպանցիկ արել են և շատ սխալ են արել, հետևաբար այս վիճակը ունենք: Հետևաբար` ես զերծ կմնամ թեկուզ հպանցիկ հայտարարություններից մինչև գործի ավարտը»:
Ամեն դեպքում մեզ հաջողվեց պարզել, որ գործի տեղափոխման պատճառը պայմանավորված է նրանով, որ գործում մեղադրվում են ոստիկանության աշխատակցի և քաղաքապետի որդիները, հետևաբար քննության հարցում կաշկանդվածություն չառաջանալու համար գործը տեղափոխել են այլ մարզի քննչական բաժին:
