ՌԴ ԱԳՆ խոսնակ Մարիա Զախարովան հայտարարել է, որ Մոսկվան Երեւանից հստակ արձագանք է է ակնկալում նախօրեին տարածված փաստաթղթի առնչությամբ: Խոսքը փաստաթղթի մասին է, որն ըստ այն տարածող տեղեկատվական հարթակների, վերաբերում է ապրիլի 5-ի բրյուսելյան եռակողմ հանդիպմանը եւ այսպես ասած արտահոսել է դրանից: Ներկայացվածի բովանդակության մեջ խոսվում է այն մասին, որ Բրյուսելում այսպես ասած փակ ռեժիմում քննարկվել են ռազմա-քաղաքական հարցեր, մասնավորապես Հայաստանում ՌԴ ռազմական ներկայությունը փոխարինել ՆԱՏՕ, ԱՄՆ, ԵՄ մասնագետներով, նաեւ Հայաստանի ռազմավարական ենթակառուցվածքների անցում արեւմտյան վերահսկողության տիրույթ, եւ այդօրինակ այլ հարցեր:
Տեղեկությունը նախօրեին տարածել են կարծես թե ադրբեջանական աղբյուրները եւ առ այսօր չկա որեւէ պաշտոնական արձագանք թե Բրյուսելից ուՎաշինգտոնից, թե Երեւանից: Մոսկվան «որսում» է տարածված տեղեկությունն ու փաստորեն Երեւանին դնում հստակ արձագանքի անհրաժեշտության առաջ: Եթե հայտարարվի, որ այդպիսի քննարկում եղել է, ապա դա ըստ էության նշանակելու է ուղիղ առչակատում Ռուսաստանի հետ: Ի դեպ, այստեղ թերեւս ուշադրության է արժանի այն, որ իբրեւ թե բրյուսելյան հանդիպումից «արտահոսած» այդ տեղեկությունը ադրբեջանցիները հանրայնացնում են նույն օրը, երբ պաշտոնապես հայտարարվում է նաեւ Արցախից ռուս խաղաղապահների վաղաժամ դուրսբերման վերաբերյալ ռուս-ադրբեջանական բարձրագույն մակարդակով կայացված որոշման մասին:
Բարդ է ասել, կա՞ որեւէ էական կապ այդ ժամանակագրական զուգորդման պայմաններում, բայց բավականին նշմարելի է բաց թողնված «արտահոսքի» առնչությամբ Բաքվի հաշվարկը: Եթե Երեւանը հերքում է այդ տեղեկությունը, հերքում է, որ Բրյուսելում քննարկվել են այդպիսի հարցեր, ապա Բաքուն դա կփորձի այսպես ասած խաղարկել եւ վաճառել Արեւմուտքում: Իսկ առայժմ փորձել է խաղարկել Ռուսաստանում եւ Զախարովայի հարցադրումը վկայում է, որ առնվազն այս պահին խաղարկումը հասել է որոշակի նպատակի՝ հնչել է Երեւանին ուղղված հարց:
Մյուս կողմից, եթե ադրբեջանական տիրույթում հրապարակվածը իրապես արտահոսք է, հարց է առաջանում, թե ի՞նչպես, ու՞մ միջոցով է այդ փաստաթուղթը «արտահոսել» Բրյուսելի փակ հանդիպումից: Ո՞վ է մի կողմից հարաբերվել այնտեղ Երեւանի հետ, մյուս կողմից «փոխանցում» կատարել Բաքվին՝ հանդիպումից հետո: Բոլոր դեպքերում, տեղի ունեցողը ակնհայտորեն վկայում է առնվազն տեղեկատվական քաղաքականության առնչությամբ Երեւանի ձախողման մասին: