2010-ի ինն ամսվա ընթացքում ՎՈՒԱՄ-ի ներքին առևտուրն անցյալ տարվա համեմատ աճի միտում է արձանագրել և հասել գրեթե 3 մլրդ դոլարի, այս մասին ասված է ՎՈՒԱՄ կազմակերպության գլխավոր քարտուղար Վալերի Չեչելաշվիլիի հայտարարության մեջ, որը տարածվել է Աստանայում ընթացող ԵԱՀԿ գագաթնաժողովի ընթացքում,-հայտնում է APA գործակալությունը:
«Այս տարի ՎՈՒԱՄ-ի ներքին առևտրի նոր բաղադրիչներից է դարձել Ուկրաինա ադրբեջանական նավթի մատակարարումը:
Ընթացիկ տարվա վերջին ինն ամսում ՎՈՒԱՄ-ի տրանսպորտային փոխադրամիջանցքով Ադրբեջանից Ուկրաինային մատակարարվել է ավելի քան 700 մլն դոլար ընդհանուր գումարի մոտավորապես 1,5 մլն տոննա նավթ, որը կազմել է Ուկրաինայի ամբողջ սպառման 25 տոկոսը»,- ասված է հայտարարության մեջ: «ՎՈՒԱՄ-ի ներքին առևտրի ցուցանիշների մասին հարկ Է նշել, որ 2006 թ. դրանք 2 մլրդ դոլարից պակաս էին, 2008 թ. հասել են ռեկորդային 4 մլրդ դոլարի` չնայած ֆինանսական ճգնաժամին և Վրաստանի նկատմամբ Ռուսաստանի ագրեսիային:
2009 թ. այդ ցուցանիշը կրճատվել է 30 տոկոսով և կազմել 2,4 մլրդ դոլար: Վերջին ինն ամսվա ընթացքում աճ է արձանագրվել, սպասվում է, որ ամբողջ 2010 թ. ընթացքում ՎՈՒԱՄ-ի երկրների առևտուրը կկազմի 4,3 կամ 4,4 մլրդ դոլար: Իսկ առաջիկա 4-5 տարվա ընթացքում ծրագրվում է այդ ցուցանիշը հասցնել երկնիշ թվի»,- ասել է Չեչելաշվիլին:
