Իրանի արտաքին գործերի նախարարության պաշտոնական ներկայացուցիչ Նասեր Քանանին պարզաբանել է իր երկրի դիրքորոշումը Հարավային Կովկասի տարածաշրջանի վերաբերյալ՝ ի պատասխան վերջերս Բրյուսելում Հայաստանի, Միացյալ Նահանգների և Եվրամիության միջև եռակողմ հանդիպման հետ կապված հարցին:
Ինչպես հաղորդում է «ԻՐՆԱ»-ն, Քանանին ընդգծել է տարածաշրջանային համագործակցության կարևորությունը Կովկասում խաղաղության և կայունության հաստատման համար: Նրա խոսքով՝ տնտեսական համագործակցության ամրապնդումն ու կապերի ընդլայնումն արդյունավետ դեր են խաղում կովկասյան տարածաշրջանում խաղաղության, կայունության և տնտեսական զարգացման հաստատման գործում: Իրանի ԱԳՆ ներկայացուցիչը նաև ընդգծել է տարածաշրջանային ներուժի, այդ թվում՝ «3+3» խորհրդատվական մեխանիզմի օգտագործման անհրաժեշտությունը մնացած վեճերը լուծելու համար․
«Իրանը բազմիցս հայտարարել է, որ աջակցում է տարածաշրջանի երկրների տարածքային ամբողջականությանը և իր հողի նկատմամբ ինքնիշխանության իրավունքին՝ առանց միջազգայնորեն ճանաչված սահմանների փոփոխության: Նա նաև բազմիցս կոչ է արել Ադրբեջանին և Հայաստանին՝ իր երկու հարևաններին, իրենց վեճերը կարգավորել երկխոսության միջոցով»:
