ՀՀ տարածքում կան փակ և դժվարանցանելի ավտոճանապարհներ։
Ինչպես տեղեկացրին ՀՀ ներքին գործերի նախարարության փրկարար ծառայությունից, փակ են Արագածոտնի մարզում «Ամբերդ» բարձր լեռնային օդերևութաբանական կայանից դեպի Ամբերդ ամրոց և Քարի լիճ տանող ավտոճանապարհները:
Կապանից Սիսիանի «Զանգեր» ավտոճանապարհը դժվարանցանելի է բեռնատարների համար, իսկ Վարդենյաց լեռնանցքը՝ բոլոր տեսակի տրանսպորտային միջոցների համար:
Ըստ աղբյուրի՝ Սյունիքի, Գեղարքունիքի (բացառությամբ Սևան քաղաքի) մարզերում և Արագածի տարածաշրջանում տեղում է ձյուն:
Նշվում է, որ Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը բաց է բոլոր տեսակի տրանսպորտային միջոցների համար։
ՀՀ ՆԳՆ փրկարար ծառայությունը վարորդներին խորհուրդ է տալիս երթևեկել բացառապես ձմեռային անվադողերով։
