Բուլղարիայի Ժողովրդական ժողովը (Խորհրդարանը) ընդունել է վարչապետ Նիկոլայ Դենկովի գլխավորած կառավարության հրաժարականը. այդ որոշմանը միաձայն կողմ է քվեարկել 216 պատգամավոր։ Կառավարության հրաժարական տալու առաջարկը խորհրդարան է ներկայացվել մարտի 5-ին։ Այդ մասին տեղեկանում է ՏԱՍՍ գործակալությունից:
Սահմանադրության համաձայն՝ Դենկովի կաբինետն իր պարտականությունները կկատարի մինչև Բուլղարիայի նոր կառավարության ընտրությունները։
Բուլղարիայի կառավարության հրաժարականը տեղի է ունենում պլանային ռոտացիայի շրջանակներում, որի շուրջ համաձայնության են եկել «Քաղաքացիներ հանուն Բուլղարիայի եվրոպական զարգացման» և «Ժողովրդավարական ուժերի միություն» (ՔԲԵվԶ-ԺՈւՄ) կոալիցիան և «Շարունակում ենք փոփոխությունները» – «Ժողովրդավարական Բուլղարիա» (ՇՓ-ԺԲ) դաշինքն այն բանից հետո, երբ նրանք չկարողացան ստեղծել լիարժեք կոալիցիա, սակայն երկրի կառավարման կայուն կառույց ձևավորեցին 2023 թ. ապրիլի 2-ին անցկացված խորհրդարանական ընտրություններից հետո։
Դենկովը վարչապետ է ընտրվել անցյալ տարվա հունիսի 6-ին և, պայմանավորվածության համաձայն, մարտին պետք է կառավարության հրաժարականի դիմում ներկայացներ խորհրդարան, իսկ մի շարք պարտադիր ընթացակարգերից հետո նրա լիազորությունները պետք է անցնեն փոխվարչապետ և արտգործնախարար Մարիա Գաբրիելին:
Այժմ չկան լիակատար երաշխիքներ, որ ռոտացիան հաջողությամբ կանցնի, քաղաքական միավորումների միջև լուրջ տարաձայնություններ են առաջացել երկրի կառավարման ծրագրի և կադրային քաղաքականության շուրջ։ Մարտի 5-ին ՔԲԵվԶ-ԺՈւՄ-ը ՇՓ–ԺԲ-ին է փոխանցել կոալիցիոն համաձայնագրի նախագիծը. եթե այն մերժվի, ապա, հավանաբար, Բուլղարիայում արտահերթ խորհրդարանական ընտրություններ կանցկացվեն։
