«Ժառանգություն» կուսակցության նախագահ Րաֆֆի Հովհաննիսյանն այսօր, խոսելով WikiLeaks-յան հրապարակումների մասին, նշեց, որ դրանք մեզ նոր դարաշրջան են հրավիրում, և քաղաքականությունը դառնալու է շատ ավելի թափանցիկ ու հրապարակային:
Հովհաննիսյանը նկատեց, որ վերջին 20 տարիների ընթացքում օտար դեսպանների, հավատարմատարների հետ իր հանդիպումների ժամանակ միշտ իրեն զգացել է «արձանագրության վրա». «Երբեք պետք չէ մտածել, որ կարելի է ինչ-որ խորհրդատվական առաջարկ անել, բարի խորհուրդ ներկայացնել, և դա մնա գաղտնի: Չկա գաղտնիք, որ չիմացվի, և պետք է հասկանալ, որ արձանագրող դիվանագետը ևս կարող է սուբյեկտիվ մոտեցում ունենալ և վերադաս մարմնին զեկուցելով ինքն էլ իր՝ ինչ-որ հարցերը լուծելու խնդիրն ունի»:
Նա մտահոգիչ համարեց, որ որոշ հայ քաղաքական գործիչներ՝ թե՛ ընդդիմադիր, թե՛ իշխանական դաշտից, «այնպես են բացվում և անկեղծանում», որ ակնհայտ է, որ այդտեղ ոչ թե ազգային, համապետական խնդիր է դրված, այլ սեփական ճակատագրի հարցի լուծումը: Րաֆֆի Հովհաննիսյանը հույս հայտնեց, որ WikiLeaks-յան հրապարակումները ահազանգ կլինեն այդ գործիչների համար և վերջիններս կհասկանան, որ «չի կարելի խաղ տալ օտար մայրաքաղաքներում կամ այլ երկրների դիվանագետների հետ և փորձել ժողովրդի հաշվին ինչ-որ դիվիդենտներ բերել»:
