Գեղարքունիքի մարզպետ Կարեն Սարգսյանն ընդունել և մարզպետի շնորհակալագրով խրախուսել է «Tesvan» ՍՊԸ-ի կողմից Սևան համայնքի 9-12-րդ դասարանցիների և Սևանի բազմագործառութային պետական քոլեջի ուսանողների միջև անցկացված մրցույթի եզրափակիչ փուլի հաղթողներին։
Ինչպես տեղեկացավ Գեղարքունիքի մարզպետի աշխատակազմից՝ Սևան քաղաքում 2019 թվականին հիմնադրված որակի ապահովման ծառայություններ մատուցող «Tesvan» ընկերության նպատակն է նպաստել ՏՏ ոլորտի զարգացմանը, աշխատատեղերի ստեղծմանը, աջակցել ոլորտով հետաքրքրված անձանց՝ սկսելու սեփական կարիերան։ Ընկերությունը պարբերաբար կազմակերպում է ՏՏ ոլորտի անվճար դասընթացներ երիտասարդների համար՝ շարունակելով բացահայտել նոր տաղանդների և ճանաչելի դարձնել Սևանը որպես տեխնոլոգիական քաղաք:
Գեղարքունիքի մարզպետի աշխատակազմի աջակցությամբ 2023 թվականի դեկտեմբեր ամսին կայացել է մրցույթի առաջին փուլը, որին մասնակցել են Սևան համայնքում գործող մարզային ենթակայության 13, մեկ ավագ դպրոցի 9-12-րդ դասարանների և Սևանի բազմագործառութային պետական քոլեջի սաները։ Վերջիններիս տրվել է 30 հարցից բաղկացած թեստային առաջադրանք՝ նրանց տրամաբանական կարողությունները բացահայտելու նպատակով։
Առաջին փուլը հաջողությամբ հաղթահարած 30 մասնակից հնարավորություն է ստացել մասնակցելու մրցույթի երկրորդ փուլին:
Արդյունքում՝ հաղթող 3 մասնակիցները «Tesvan» ՍՊԸ-ի կողմից ստացել են համակարգիչներ, իսկ մյուս մասնակիցներն արժանացել են խրախուսական նվերների։
Երկրորդ փուլ անցած 30, ինչպես նաև լավագույն արդյունք ցուցաբերած ևս 10 մասնակցի հետ ընկերությունն արդեն իրականացնում է ոլորտին վերաբերող վերապատրաստումներ՝ օգնելով նրանց ՏՏ ոլորտում մասնագիտանալու և կարիերան սկսելու հարցում:
Գեղարքունիքի մարզպետ Կարեն Սարգսյանը մրցույթի կազմակերպիչների և հաղթողների հետ հանդիպմանը լսել է նրանց կարծիքներն ու առաջարկությունները, ներկայացրել իր տեսլականը՝ ծրագրի շարունակականությունն ու ընդլայնումն ապահովելու ուղղությամբ։
«Շնորհակալ եմ մրցույթի կազմակերպիչներին, մասնակիցներին և հաղթողներին, քանի որ նման մրցույթ-ծրագրի իրականացումը մեր կրթական հաստատություններում առայժմ միակն է, և կցանկանայի, որ այն ընդգրկեր նաև մարզի մյուս համայնքների դպրոցները։
Այդ նպատակի իրականացման համար ուզում եմ վստահեցնել, որ մարզպետի աշխատակազմը կցուցաբերի բավարար աջակցություն։ Ցանկալի կլինի, որ ծրագրի հաղթողներն այցելեն մեր մարզի մյուս համայնքների դպրոցներ, ներկայացնեն իրենց ձեռքբերումները համակարգչային գիտելիքների ոլորտում, ոգևորեն և ճիշտ ուղղություն ցույց տան աշակերտներին»,-նշել է մարզպետ Կարեն Սարգսյանը։
