Մյունխենի դատախազությունը եւ Գերմանիայի Դաշնային քրեական ոստիկանությունը հաստատել են մամուլի տեղեկությունը, որ Բունդեսթագի երկու նախկին պատգամավորներ կասկածվում են Ադրբեջանից կաշառք ստանալու եւ ԵԽԽՎ-ում քաղաքական լոբբինգ իրականացնելու մեջ, հարուցված է քրեական գործ, ընթանում է նախաքննություն: Այդ մասին գրում է Եվրոպայում ադրբեջանական վտարանդիության լրատվամիջոցներից MejdanTV-ն՝ հղելով գերմանական մամուլի մի շարք հրապարակումների:
Ավելի վաղ նույն աղբյուրը հայտնել էր, որ Ադրբեջանից կաշառք ստանալու մեջ կասկածվում են Բունդեսթագի նախկին պատգամավորներ Էդուարդ Լինթերը եւ Աքսել Ֆիշերը: Հայտնի է դարձել, որ Գերմանիայի Դաշնային քրեական ոստիկանությունը բացահայտել է Ադրբեջանի իշխանության ներկայացուցչին, ում միջոցով Բունդեսթագի պատգամավորները կաշառք են ստացել:
Նա Միլլի մեջլիսի նախկին պատգամավոր Էլխան Սուլեյմանովն է: Ներգրավվե՞լ է Սուլեյմանովը որպես կասկածյալ կամ Գերմանիայի իշխանությունները համապատասխան հայց են հարուցել՝ հայտնի չէ:
Անցյալ տարվա նոյեմբերին Բաքվում Գերմանիայի դեսպանը հրավիրվել էր Ադրբեջանի ԱԳՆ, որտեղ նրան պաշտոնական բողոք էր ներկայացվել ոչ կառավարական կազմակերպություններին «ապօրինի ֆինանսական աջակցություն ցուցաբերելու» համար: Բաքվում Գերմանիայի դեսպանատունն այդ առթիվ հրապարակել էր պարզաբանում, որտեղ հստակ նշաված էր, որ «անհատական դրամաշնորհ է հատկացվել հետաքննող լրագրող Մոհամադ Կեկալովին»: Վերջինս կալանավորված է եւ մեղադրվում է «դրամական մաքսանենգության» մեջ:
Ըստ երեւույթին, Մյունխենի դատախազության եւ Դաշնային քրեական ոստիկանության կողմից Ադրբեջանի «խավիրային դիվանագիտության» բացահայտումը բացի իրավականից, ունի նաեւ քաղաքական կողմ: Թեմայի շուրջ հրապարակումներից մեկը հիշեցնում է, որ Ադրբեջանը հսկայական միջոցներ է ծախսել եւ կազմակերպել համաեվրոպական նշանակության միջոցառումներ՝ «բարձրացնելով իր վարկանիշը, իսկ եվրոպական հանրությունը տարիներ շարունակ չտեսնելու է տվել Ալիեւների իշխող ընտանիքի ավտորիտարիզմը»:
Հրապարակման հեղինակը նաեւ անդրադառնում է Կլիմայի հարցերով համաշխարհային խորհրդաժողովն այս տարի Բաքվում անցկացնելու որոշմանը եւ համարում, որ դա «քաղաքական առումով ճիշտ չէ»: Կա՞ Եվրոպայում կասկած, որ այդ համաժողովն Իլհամ Ալիեւը կօգտագործի սեփական լեգիտիմության հաստատման նպատակով: Ըստ երեւույթին, նման մտահոգություններ եվրոպական հանրությունն ունի:
Մյունխենի դատախազությունը եւ Դաշնային քրեական ոստիկանությունը չեն հայտնում, թե գործի նախաքննությունն ինչ փուլում է, Բունդեսթագի նախկին պատգամավորներին մեղադրանք առաջադրվե՞լ է կամ կառաջադրվի՞: Սպասել գործի արագ բացահայտման, թերեւս, չարժե: Հնարավոր է՝ Գերմանիայի պատկան մարմիններն էլ շահագրգռված չեն: Խնդիրը, հավանաբար, ավելի շատ քաղաքական նշանակություն ունի:
Իլհամ Ալիեւը հայտարարել է, որ ԵԽԽՎ-ում ադրբեջանական պատվիրակության մանդատը «պետք է մինչեւ տարեվերջ վերականգնվի, այլապես Ադրբեջանը Եվրոպայի խորհրդին անդամակցության հարցում այլ որոշում կընդունի»: ԵԽԽՎ-ում Ադրբեջանի «խավիարային դիվանագիտության» բացահայտումը, երեւի, անուղղակի ազդակ է, որպեսզի այլ երկրների պատգամավորներ չգայթակղվեն: Էական է, որ մամուլի տեղեկությունը պաշտոնապես հաստատվել է, գործն ընթացքի մեջ է:
Բացառված չէ, որ հետաքննությունը բացահայտի «խավիրային դիվանագիտությանը» ներգրավված ադրբեջանցի այլ պաշտոնյաների եւս: Այդ դեպքում Իլհամ Ալիեւը կհայտնի բարդ կացության մեջ: Իսկ եթե գերմանացի նախկին պատգամավորները խոստովանեն, որ Բաքվից ստացած գումարներով կաշառել են նաեւ այլ երկրների պատգամավորների, ապա գործի քաղաքական հնչեղությունը շատ ավելի բարձր կլինի:
