Իրանի նախագահ Իբրահիմ Ռեյիսին Թեհրանում ընդունելով Սուդանի արտգործնախարարի պաշտոնակատարին հայտնել է, որ Իրանը ողջունում է դիվանագիտական հարաբերությունը վերականգնելու Սուդանի պատրաստակամությունը: Ռայիսին հայտարարել է, որ Թեհրանը ուզում է նպաստել Սուդանի ուժեղ կառավարության ձեւավորմանը: Այս տեղեկությունն առաջին հայացքից քիչ ընդհանուր բան ունի այն խնդիրների հետ, որոնք հուզում են կամ կարող են հուզել Հայաստանին՝ ելնելով անվտանգության միջձավայրից եւ դրանում առկա իրողություններից:
Գործնականում սակայն, տեղեկությունը ըստ էության ուղիղ առնչություն ունի այդ միջավայրին, եթե դիտենք, թե ինչպիսի աշխարհագրական դիրքում է Սուդանը՝ աֆրիկյան խոշոր պետություններից մեկը, որը ափամերձ է Կարմիր ծովին: Կարմիր ծովն այսօր մերձավորարեւելյան մեծ ռեգիոնի առանցքային գոտիներից մեկն է՝ հաշվի առնելով հայտնի իրադարձությունները, եւ Կարմիր ծովում այսօր ծավալվող զարգացումներին ներգրավվածություն ունեն ոչ միայն ռեգիոնալ, այլ նաեւ համաշխարհային խոշոր խաղացողները:
Այդ համատեքստում, Իրան-Սուդան հարաբերության վերականգնումը նախ խոսում է աֆրիկյան մայրցամաքում ընդհանրապես Իրանի դերակատարության աճի մասին, քանի որ այդ դերը չի սահմանափակվում լոկ Սուդանով, եւ երկրորդ՝ ռեգիոնալ անվտանգության միջավայրում եւ տեղի ունեցող զարգացումների համատեքատում Իրանի դերակատարության աճի հեռանկարի մասին:
Իսկ դա ինքնին նշանակում է, որ Իրանի կշիռը կարող է ավելանալ նրա կենսագործունեության ամբողջ արեալով, այդ թվում բնականաբար Կովկասում: Բնականաբար սա Հայաստանի համար կարեւոր դիտարկման հանգամանք է, հաշվի առնելով այն, որ կազմում է ընդհանրապես աշխարհակարգային ուժերի բալանսի վերափոխման մեծ գործընթացի կարեւոր մասերից մեկը, որն իր մեջ պարունակում է ինչպես հնարավորությունների, այնպես էլ բնականաբար ռիսկերի չափաբաժիններ, հետեւաբար դրանք կառավարելու եւ Հայաստանի համար դրական հարաբերակցություն ապահովելու անհրաժեշտություն:
