Երեկ BBC-ն տեղեկություն տարածեց այն մասին, որ ԱՄՆ իշխանությունները կոչ են արել Սիրիայում գտնվող իրենց քաղաքացիներին շտապ լքել արաբական այդ երկրի տարածքը` հաշվի առնելով երկրում տեղի ունեցող իրադարձությունները: Հիշեցնենք, որ այս տարվա ապրիլին Սիրիայից դուրս էին բերվել ԱՄՆ դիվանագետները և ամերիկյան ընկերությունների աշխատակիցները:
«Առաջին լրատվականը» ՀՀ ԱԳՆ մամլո քարտուղար Տիգրան Բալայանից փորձեց պարզել` արդյո՞ք Հայաստանը հանդես է գալու նման կոչով: Մեզ հետ զրույցում Տ. Բալայանն ասաց, որ Հայաստանը նման կոչով առայժմ հանդես չի եկել, և եթե հարկ լինի, կարվի հայտարարություն, բայց այն կարվի հրապարակավ:
Հիշեցնենք, որ Սիրիայում շարունակվում են նախագահ Բաշար Ալ-Ասադի դեմ ցույցերը: Որոշ քաղաքներում կառավարական ուժերի և ընդդիմադիրների միջև տեղի են ունենում զինված բախումներ: Սիրիայի կառավարությունը պնդում է, որ պայքարում է ահաբեկիչների դեմ, մինչդեռ արևմտյան երկրները կոչ են անում դադարեցնել ընդդիմադիրների հանդեպ բռնաճնշումները: