2010-2011 թթ. ակտիվ չէին հայկական թատրոնների համար: Առանձնապես ինչ-որ խոշոր բեմադրություններ չեն եղել, նոր ներկայացումներ չեն բեմադրվել: Հայկական թատրոնների շատ քիչ տոկոսն է մասնակցում «Հայֆեստ» միջազգային թատերական փառատոնին: Այսօր լրագրողների հետ հանդիպմանն ասաց «Հայֆեստ» 9-րդ միջազգային թատերական փառատոնի նախագահ Արթուր Ղուկասյանը: Պատճառն, ըստ նրա, այն է, որ մեր թատրոնները պատրաստ չեն հանդիսատեսին ներկայացնել փառատոնային ներկայացումներ, չունեն ոչ մի նորություն` բացի խաղացանկային ներկայացումներից:
«Գուցե կան թատրոններ, որ հասկանում են, թե չունեն փառատոնային ներկայացումներ: «Օրինակ` «Մուսա լեռան քառասուն օրը» ներկայացումը փառատոնային չէ, քանի որ այդ ներկայացման մեջ չկա որևէ նոր բան: Հանդիսատեսը գալիս ու նստում է 900 տեղանոց դահլիճում ու դիտում է այն»,- նկատեց Ղուկասյանը ` ընդգծելով, որ հայկական թատրոնները լճացման մեջ կլինեն այնքան ժամանակ, քանի դեռ չեն ցանկանա որևէ նոր բան սովորել:
«Մեր թատրոնների ղեկավարները չեն հաճախում օրինակ` «Հայֆեստին»: Մարդիկ չեն ցանկանում նոր բան տեսնել: Մենք հայկական շոու-կես չենք անում»,- կատակով ասաց նա:
Այս տարի հայաստանյան թատրոններից «Հայֆեստին» կմասնակցեն Վահան Բադալյանի «Ճայը», «Միհր» թատրոնը, Գրիգոր Խաչատրյանի «Ցիանակալիում կաթով կամ առանց կաթի» ներկայացումները:
