Այսօր իրավապաշտպան Պուշկին Սերոբյանն անդրադարձավ է բանակում տեղի ունեցող իրավախախտումներին և դրանց պատճառներին: Նա ասաց, որ մինչև ասուլիս գալը հետևել է մամուլի հրապարակումներին և զարմացած է, որ մոտ 20 ՀԿ պահանջում են նախագահի հրաժարական, նախարարի հրաժարական, կան նաև, որ առաջարկում են պաշտպանության նախարարին ինքնասպան լինել, ինչը «հակաքրիստոնեական» է: «Երկրի նախագահը հիվանդանոցի պահակ չէ, եղբա՛յր, դու ով ես, ինչի ես պահանջում: 94-ից բանակում կային մահվան դեպքեր, և այն ժամանակ նախագահ էր Լևոն Տեր-Պետրոսյանը: Սերժ Սարգսյանը պետք է պատասխան տա երեք տարիների համար; Չպետք է չարաշահել, մենք պետք է իրականությունը նայենք, աշխարհում չկա որևէ բանակ, որ տեղի չունենան դեպքեր: Հարցը արհեստականորեն քաղաքականացվում է, և խախտվում մեր երկրի քաղաքական անդորրը»,- ասաց Պուշկին Սերոբյանը` ավելացնելով, որ ինքը մտահոգություն է ապրում, երբ արժեզրկվում է մեր խոսքը:
Նրա խոսքերով` ընդհանուր դեպքերը նվազել են 7,2 տոկոսով, մահվան ելքերը` 32,2 տոկոսով, ինքնասպանությունների թիվը` 44, 4 տոկոսով:
«Կրիմինոգեն գործոնները նկատի ունենանք: Բանակ են գնում 18-20 տարեկան տղաներ, չկան հարազատները, կարոտ, սիրած աղջիկ, որը կարող է մեղմել այս գործոնը: Եկեք մտածենք` մենք ինչ պայմաններում ենք»,- ասաց Պ. Սերոբյանը և ավելացրեց. «Պետք է քննադատենք, բայց պետք է լինի հստակ առարկայական և ճիշտ քննադատություն, եթե մենք ասում ենք, որ նախարարը մեկ ամսվա ընթացքում միջոցներ չձեռնարկի, ուրեմն պահանջում ենք հրաժարական, մենք հարցը տեղափոխում ենք քաղաքական ոլորտ, սա խախտում է երկրի քաղաքական անդորրը»: