Այսօր ռուսաստանցի ամենահայտնի հայ գործարարներից մեկը` Ռուբեն Վարդանյանը, հարցազրույց է տվել «Ազատություն» ռադիոկայանի հայկական ծառայությանը, որը ներկայացնում ենք ձեր ուշադրությանը:
«Նա պարբերաբար հանդես է գալիս բարեգործական և կրթական ծրագրերով, սակայն միշտ չէ, որ հայաստանյան հասարակությունը այդ ծրագրերը միանշանակ է ընդունում:
Այսպես՝ Դիլիջանում միջազգային դպրոց ստեղծելու նրա նախագիծը, որն այսօր էլ ընթացքի մեջ է, արժանացավ «Մենք դեմ ենք օտարալեզու դպրոցներին» նախաձեռնության քննադատությանը»։
«Կարծում եմ՝ այստեղ կա մեր մեղավորությունը, որ հասարակությունը մեզ սխալ է հասկացել: Մենք ընդամենը մասնավոր միջազգային դպրոց ենք կառուցում, որտեղ պետք է սովորեն ոչ միայն հայ երեխաները, այլ նաև արտասահմանցիներ, և ինչպես ընդունված է ամենուր` կրթությունը այդ դպրոցում անգլերեն լեզվով է լինելու, հակառակ դեպքում` արտասահմանցու չես բերի Դիլիջան»,- «Ազատություն» ռադիոկայանի հետ զրույցում ասել է Ռուբեն Վարդանյանը:
«Իսկ ինչ վերաբերում է հայոց լեզվին, ապա սա լուրջ խնդիր է, և այս խնդրով պետք է ամենայն լրջությամբ զբաղվել, պետք է մեծ ներդրումներ անել, որպեսզի կարողանանք պահպանել հայերենը»,- ասել է նա:
Ամեն դեպքում, այսօր արդեն դպրոցը կառուցվում է, և Վարդանյանը հույս է հայտնում, որ 2013 թվականի սեպտեմբերին կրթօջախն իր դռները կբացի առաջին աշակերտների առջև:
Ռուբեն Վարդանյանը նաև շարունակում է «Տաթև» ծրագիրը, մասնավորապես` առաջիկայում այստեղ սրճարան է բացվելու, քանի որ ճոպանուղուն սպասող մարդկանց մեծ հերթեր են գոյանում և մարդիկ հնարավորություն կունենան այդ ժամերն անցկացնել ավելի հարմարավետ պայմաններում:
«Տրոյկա դիալոգ» ընկերության սեփականատերը բարեգործական ծրագրեր է իրականացնում նաև Ղարաբաղում, մասնավորապես` նա անձամբ օգնում է 250 ղարաբաղցի երիտասարդ ընտանիքների, և արդեն, ինչպես ինքն է ասում, «280 ղարաբաղցի երեխա ունի»:
«Խնդիրն այն է, որ Ղարաբաղում հնարավորինս շատ երեխա ծնվի` սա է այս ծրագրի նպատակը»,- ասել է նա:
Մոսկվայում տարբեր հայերի կարելի է հանդիպել` տարբեր երկրներից, և նրանցից շատերն են ասում, որ կուզենան օգնել Հայաստանին, կուզենան լուրջ ներդրումներ կատարել, սակայն չեն հավատում, որ Հայաստանում կարելի է անվտանգ բիզնես անել, և որ եթե ամեն ինչ օրինական լիներ, իրենք ավելի ակտիվ կլինեին: Ռուբեն Վարդանյանն ասում է, որ իրականում ամեն ինչ մարդուց է կախված, և միշտ էլ կարելի է հազար ու մի պատճառ գտնել ինչ-որ բան չանելու համար:
«Իհարկե, Հայաստանում կան խնդիրներ, և ամենևին էլ իդեալական պայմաններ չեն բիզնեսի համար, սակայն ցանկության դեպքում կարելի է բոլոր դժվարությունները հաղթահարել. սա յուրաքանչյուր մարդու ընտրությունն է»,- ընդգծել է Ռուբեն Վարդանյանը:
Վարդանյանը, ով Ռուսաստանի ամենահայտնի ֆինանսիստներից է և Ռուսաստանի արժեթղթերի շուկայի հիմնադիրը, վստահեցնում է, որ Հայաստանում տնտեսությունը թեև դանդաղ, բայց զարգանում է, և առաջխաղացում այսօր կա:
«Ազատություն» ռադիոկայանի հարցին` իսկ անկախության 20-ամյակի տոնի նախօրեին ինչպե՞ս կամփոփեք անցած տարիները, Վարդանյանը պատասխանել է. «Եթե անկեղծ լինենք, ապա մենք պետք է հպարտանանք, քանի որ շատ բաների ենք հասել այս 20 տարիներին` հաղթել ենք պատերազմում, կարողացել ենք հաղթահարել սարսափելի երկրաշարժի հետևանքները, կարողացել ենք պետականություն կառուցել, երբ 800 տարի այն չունեինք: Մենք շատ թանկ գին ենք վճարել` խոսքն այն մասին է, որ այս տարիներին Հայաստանից շատ-շատերն են մեկնել: Գիտեմ, որ այսօր էլ կան նման տրամադրություններ, գիտեմ, որ այսօր էլ շատերն ուզում են մեկնել Հայաստանից, և Հայաստանը ծաղկուն երկիր կլինի միայն այն դեպքում, երբ հայաստանցի երիտասարդը իր ապագան տեսնի հենց Հայաստանում: Սա է ամենակարևորը»: