Վիետնամական պատերազմի վետերանը 15 միլիոն դոլար պարգևատրություն է ստացել այն բանի համար, որ օգնել է բացահայտել բժշկական ընկերության կողմից իրականացված խարդախությունը: Այս մասին գրում է The New York Post-ը:
63-ամյա Ռիչարդ Ուեսթը մի քանի տարի միայնակ հետաքննում էր բժիշկների կողմից իրականացվող ապօրինությունները: Նա երկար ժամանակ դժգոհ էր իրեն մատուցվող բժշկական ծառայություններից: 2004թ.-ին նրան հրաժարվել էին բուժել` հայտարարելով, որ բուժսպասարկման համար նախատեսված զեղչը, որից օգտվում էր վետերանը, սպառվել է, և իրենք չեն կարող բուժել նրան:
Պատերազմի վետերանը միայնակ սկսել է հետաքրքրվել, թե իրականում ինչ պատճառով են իրեն հրաժարվում բուժօգնություն տրամադրել, և պարզել է, որ Maxim Healthcare ընկերությունը, որը զբաղվել է իր սոցիալական ապահովության խնդիրներով, պետությանը հաշիվներ է ներկայացրել, որոնք իրականում ոչ մեկի բուժսպասարկմանն ուղղված չեն եղել: Ուեսթն, ի վերջո, փաստաբան է վարձել և դիմել պետական համապատասխան մարմիններ:
Արդյունքում պարզվել է, որ ընկերությունն ապօրինի վաստակել է 61 միլիոն դոլար: Maxim Healthcare-ն այժմ ստիպված կլինի 121 միլիոն դոլար վճարել իր տրամադրած ծառայություններից օգտվող անձանց: Օրենքի համաձայն՝ Ուեսթին պետք է վճարվի խարդախություն կատարած ընկերության վճարված տուգանքի մի մասը, ինչը կազմում է 15 միլիոն դոլար: Վետերանը The New York Post-ին տված հարցազրույցում նշել է, որ այդ գումարով նոր բեռնատար է գնելու, վերանորոգելու է իր տունը, իսկ մնացած գումարը տալու է հաշմանդամներին օգնող բարեգործական կազմակերպություններին:
