Հայաստանի վարչապետ Նիկոլ Փաշինյանն ընդունել է ՌԴ փոխվարչապետ Օվերչուկին: հանդիպման ընթացքում, ըստ պաշտոնական հաղորդագրության, քննարկվել են հայ-ռուսական երկկողմ գործակցությանը վերաբերող տնտեսական հարցեր, նաեւ հարցեր ԵԱՏՄ օրակարգի շրջանակում: Քննարկվել են նաեւ ռեգիոնալ հաղորդուղիների ապաշրջափակմանն առնչվող հարցեր: Սա հետաքրքիր է: Չի նշանակում, թե մյուս հարցերը հետաքրքիր չեն, քանի որ դրանք էլ վերաբերում են Հայաստանի տնտեսությանը, շաղկապվելով նաեւ քաղաքական-դիվանագիտական եւ ռազմմական ներուժին, բայց հաղորդուղիների ապաշրջափակման թեման արդիական միջազգային հարց է, որի կիզակետում են Հայաստանով անցնող ճանապարհները եւ որը պարփակում է նաեւ Հայաստանի անվտանգային մարտահրավերների շրջանակը:
Օվերչուկը մի քանի օր առաջ Մոսկվայում ընդունել էր Ադրբեջանի փոխվարչապետ Շահին Մուստաֆաեւին, որը Մոսկվա էր մեկնել Հայաստանի իր գործընկեր Մհեր Գրիգորյանի հետ սահմանային հանդիպումից հետո: Այդ հանդիպումը տեղի էր ունեցել Տավուշի սահմանին՝ սահմանազատման եւ սահմանագծման հանձնաժողովների շրջանակում: Երկու փոխվարչապետները, ըստ այդ ժամանակ պաշտոնական հաղորդագրության, քննարկել էին հանձնաժողովների աշխատակարգին առնչվող կազմակերպական հարցեր: Այդ հանդիպումից հետո Մուստաֆաեւը մեկնել էր Մոսկվա եւ այնտեղ հանդիպում ունեցել Օվերչուկի հետ: Ինչպես հայտնի է, Օվերչուկը ՌԴ փոխվարչապետի կարգավիճակում մասնակցում է Հայաստանի եւ Ադրբեջանի փոխվարչապետների հետ եռակողմ ձեւաչափին, որով քննարկվում են թե սահմանազատման ու սահմանագծման, թե հաղորդուղիների ապաշրջափակման հարցեր:
Նախօօրեին Երեւանն ու Բաքուն հայտարարեցին, որ սահմանել են սահմանազատման հանձնաժողովի աշխատակարգ, ըստ որի հանդիպումները կլինեն Հայաստանի եւ Ադրբեջանի տարածքում հաջորդաբար, կամ սահմանի վրա: Դրանից հետո Օվերչուկը ժամանում է Հայաստան: Ռուսաստանին մտահոգու՞մ է, որ Երեւանն ու Բաքուն կարող են հանդիպել միմյանց տարածքում, եւ ոչ թե՝ ասենք, Մոսկվայում կամ Ռուսաստանի որեւէ այլ քաղաքում: Թե՞ Ռուսաստանին մտահոգում է այն, որ այդ հանդիպումները կարող են անցկացվել երկկողմ տրամաբանությամբ, այսինքն դրանցում ներկա չլինի Ռուսաստանը: Թե՞ Օվերչուկի այս այցի շարժառիթի հիմքում ճանապարհներն են, այլ ոչ թե սահմանազատման եւ սահմանագծման հարցը, մասնավորապես հունվարին Վաշինգտոնում սպասվող հանդիպմանն ընդառաջ, որտեղ ըստ ամենայնի առանցքային հարցը դարձյալ լինելու է հաղորդուղիների ապաշրջափակման ռեժիմը, ինչը պարզորոշ վկայեց օրեր առաջ Բաքու ժամանած պետքարտուղարի տեղակալ Օ Բրայանը:
