Թուրքական Zaman թերթի փոխանցմամբ՝ Թուրքիայի ներքին գործերի նախկին նախարար և նախկին անվտանգության ծառայության պետ Մեհմեթ Աղարը «Սուսուրլուքի գործով» դատապարտվել է 5 տարի ազատազրկման։ Դատարանը նրան մեղավոր է ճանաչել հանցավոր խումբ կազմակերպելու մեջ։
Անկարայի 11-րդ ծանր հանցագործությունների դատարանը նրան դատապարտել է «միտումնավոր հանցագործություններ կատարելու նպատակով հանցավոր խումբ կազմակերպելու» մասին 220-րդ հոդվածով։
Հիշեցնենք, որ մարտի վերջին Ստամբուլի անվտանգության ծառայությունը ձերբակալել էր 1996 թվականի նոյեմբերի 3-ին տեղի ունեցած «Սուսուրլուքի վթարի» գործով կասկածյալ Այհան Չարքընին, որը հանդես էր եկել սենսացիոն հայտարարությամբ.
«Ես կոչ եմ անում բացել «ԱՍԱԼԱ»-ի (Հայաստանի ազատագրության հայ գաղտնի բանակ) գործի արխիվները: Եթե դուք դա անեք, ապա կտեսնեք, որ մեր դեսպանների մի մասին սպանել է ոչ թե «ԱՍԱԼԱ»-ն, այլ` Թուրքիայի «խորքային պետությունը»:
