Հայաստանի արտաքին գործերի նախարարը նոյեմբերի 18-19-ին աշխատանքային այցով մեկնում է Բահրեյն, որտեղ կայանալու է Մանամայի երկխոսության ձեւաչափի արտգործնախարարական հերթական հավաքը: Մանամայի երկխոսության ձեւաչափը գործում է 2004 թվականից եւ այն Պարսից ծոցի անվտանգության հարցերի խորհրդաժողով է: Հիմնադիրը՝ Ռազմավարական հետազոտությունների միջազգային ինստիտուտն է, որը գրանցված է Լոնդոնում, եւ որի հիմնադրած ձեւաչափը գործում է Բահրեյնի արտգործնախարարության աջակցությամբ: Մանամայի երկխոսության ձեւաչափի հիմնական մասնակիցները Պարսից ծոցի գործակցության Խորհրդի անդամ երկրներն են՝ Բահրեյն, Օման, Կատար, Արաբական Միացյալ Էմիրություններ, Քուվեյթ, Սաուդյան Արաբիա:
Միաժամանակ, Մանամայի երկխոսության շրջանակում Բահրեյնի մայրաքաղաքում կազմակերպվող ամենամյա հավաքներին հրավիրյալ երկրների շրջանակը ներառում է այնպիսի պետություններ, ինչպիսիք են Ֆրանսիան, ԱՄՆ, Ավստրալիան, Գերմանիան, Թուրքիան, Ռուսաստանը, Սինգապուրը, Հորդանանը, Եգիպտոսը: Անկասկած է, որ Մանամայի երկխոսության 2023-ի հավաքին քննարկման առանցքային հարցը լինելու է մերձավորարեւելյան իրադրությունը՝ Իսրայել-Գազա պատերազմն ու դրա շուրջ ստեղծված իրավիճակը: Հայաստանի ԱԳՆ խոսնակը հայտնում է, որ Արարատ Միրզոյանը Բահրեյն այցի ընթացքում կունենա երկկողմ հանդիպումներ:
Թե հատկապես որ պետությունների արտգործնախարարների հետ են ծրագրված հանդիպումները, մանրամասններ հայտնի չեն, սակայն կասկածից վեր է, որ Բահրեյնի հավաքին մասնակցությունը կարեւոր հարթակ է Հայաստանի անվտանգային միջավայրում առկա ռիսկերի, մարտահրավերների եւ խնդիրների ուղղությամբ աշխատանքի համար: Բազմիցս ասել եմ, որ Կովկասի անվտանգության միջավայրը ձեւավորվում է երկու առանցքային ռեգիոնների ուղղությամբ գոյություն ունեցող իրողությունների, տրամադրությունների եւ միտումների անմիջական ադեցությամբ՝ սեւծովյան ավազան եւ Մերձավոր Արեւելք: Այդ իմաստով, արաբական աշխարհի երկրներն ու նրանց հետ դիվանագիտական ու տնտեսական սերտ աշխատանքը Հայաստանի անվտանգության միջավայրի համար օրգանական անհրաժեշտությունների շարքից է: Առավել եւս, եթե նկատի ունենանք այն, որ տասնամյակներ շարունակ ընդլայնելով իրենց տնտեսական ներուժը, այդ երկրները ներկայումս գտնվում են իրենց քաղաքական կշիռը եւ դերակատարումը բարձրացնելու գործընթացում:
