Կրոնական կազմակերպությունների դեմ քարոզչությունը քաղաքական նպատակներ ունի: Այսօր «Առաջին լրատվականի» հետ զրույցում նման կարծիք հայտնեց «Համագործակցություն հանուն ժողովրդավարության» կենտրոնի նախագահ, religions.am կայքի խմբագիր Ստեփան Դանիելյանը` մեկնաբանելով ՀՀ-ում դավանանքի ազատության մասին օրենքի խախտումների վերաբերյալ ԱՄՆ Պետդեպի զեկույցը: Զեկույցում նշվում էր, որ թեև ՀՀ Սահմանադրությամբ ամրագրված է դավանանքի ազատության սկզբունքը, սակայն քաղաքականությունն ու այլ օրենքները որոշակի սահմանափակում են մտցնում դավանանքի ազատության հարցում: Նաև ասված էր, որ հաշվետու ժամանակաշրջանում իշխանությունների կողմից դավանանքի ազատության հանդեպ հարգանքի որևէ փոփոխություն տեղի չի ունեցել:
«Ես համաձայն չեմ այն դիտարկման հետ, որ դավանանքի ազատության հարցում փոփոխություններ չեն եղել, այս իմաստով ԱՄՆ Պետդեպի հետ համամիտ չեմ, որովհետև փոփոխություններ եղել են և՝ դեպի վատը: Իմ դիտարկումները ցույց են տալիս, որ դա ունի նաև քաղաքական բնույթ»,- ասաց Ս.Դանիելյանը` հավելելով, որ այսօրվա կառավարությունը վարում է հատուկ քաղաքականություն, որն ուղղված է կրոնական կազմակերպությունների դեմ: Նա նշեց, որ դա են ցույց տալիս մամուլը և մի շարք այլ տվյալներ, որոնք տրամադրում են կազմակերպությունները: Ս.Դանիելյանի խոսքով` ԶԼՄ-ները ոչ միայն ատելություն և թշնամություն են սերմանում, այլև բռնության կոչեր: «Այս ամենը հանրային հեռուստատեսությամբ է հնչում, իսկ դրա համար պատիժներ են նախատեսված քրեական օրենսգրքում, բայց որևէ պատիժ չի իրականացվել, ավելին՝ եթե պատահում են շատ կասկածելի կոնֆլիկտներ, միանշանակ դատական որոշումները լինում են կրոնական կազմակերպությունների դեմ»,- փաստեց Ս.Դանիելյանը`ընդգծելով, որ սա պաշտոնական քաղաքականություն է՝ ուղղված կրոնական կազմակերպությունների դեմ:
«Համագործակցություն հանուն ժողովրդավարության» կենտրոնի նախագահի կարծիքով` սա ունի մի քանի նպատակ, որոնցից մեկն այն է, որ փորձ է արվում գաղափարախոսության բացակայությանը կրոնական բովանդակություն տալ: «Այսինքն` ձևավորվում է գաղափարախոսություն հասարակության ուշադրությունը շեղելու համար: Այս մեխանիզմը, քարոզչությունը բավականին էֆեկտիվ է աշխատում և մարդկանց մեծ մասը հետաքրքրված է աղանդների խնդրով, այլ ոչ թե երկրի անդունդը գլորվելու հարցով, սա փայլուն արդյունք է իշխանական կլանի համար»,- ասաց Ս.Դանիելյանը` հիշեցնելով, որ ընտրությունների տարի է առջևում, որի պատճառով այս թեման շատ կշահարկվի մարդկանց իրար հակադրվող կեղծ խմբերի բաժանելու համար: Նրա հավաստմամբ` սա կոնկրետ խնդիրներ լուծող պաշտոնական քաղաքականություն է, որով մարդկանց ուղեղները լվացվում են:
