Համաշխարհային շուկայում եվրոյի շուրջ տիրող խառնաշփոթից կարող են շահել հայ ներկրողները: «Առաջին լրատվականի» հետ զրույցում FOREX Club-ի վերլուծաբան Միքայել Վերդյանը հայտնեց, որ եվրոյի փոխարժեքը դրամի նկատմամբ կնվազի, ինչի արդյունքում ՀՀ ներկրողները կկարողանան եվրոն ավելի էժան գնով ձեռք բերել:
«Եվրո/դրամ փոխարժեքը համաշխարհային շուկայում եվրոյի նվազման դեպքում կարող է հասնել մինչև 500 դրամի, իսկ վերին սահմանը սեպտեմբերի 22-ից հետո կլինի 535 գնային մակարդակին մոտ»,- կանխատեսեց վերլուծաբանը:
Մ.Վերդյանի խոսքով՝ եվրոյի արժեքը դոլարի նկատմամբ բավականին կտրուկ սկսեց նվազել դեռ նախորդ շաբաթվանից, ինչը պայմանավորված էր առաջին հերթին ԱՄՆ-ում նոր աշխատողների քանակի վերաբերյալ հայտարարությամբ. պարզվեց, որ գյուղատնտեսության ոլորտում օգոստոսին նոր աշխատատեղեր չեն ավելացել, մինչդեռ վերլուծաբանները կարծում էին, որ 80 հզ-ով կավելանան: Դա բավականին լուրջ անհանգստություն առաջացրեց շուկայում՝ պայմանավորված համաշխարհային տնտեսության զարգացան տեմպերի դանդաղմամբ, և ներդրողները սկսեցին ձերբազատվել եվրոյից՝ նախապատվությունը տալով դոլարին՝ որպես ակտիվ ապաստարանի: Դրանից հետո կրքերն է՛լ ավելի թեժացան, որովհետև ուշադրության կենտրոնում նորից հայտնվեցին եվրոպական երկրների պարտքերի խնդիրները. Հունաստանի կողմից հարկաբյուջետային հատուկ քաղաքականություն վարելու ԱՄՀ առջև ստանձնած իր պարտավորությունները չկատարելու պատճառով եվրոյի անկումն է՛լ ավելի թեժացավ ու արագացավ, և մինչ օրս եվրոն գտնվում է ճնշումների տակ: Ներկայում եվրոն համաշխարհային շուկայում գտնվում է 1.36 գնային մակարդակի շուրջ:
«Եվրոն կշարունակի դեռ խոցելի մնալ մինչև հաջորդ շաբաթվա վերջը, երբ սպասվում է ԱՄՆ դաշնային համակարգի նստաշրջանը տոկոսադրույքի վերաբերյալ: Դա, հավանաբար, կմնա նույն ցածր մակարդակի վրա, բայց սպասվում է, որ համակարգի նախագահը կհայտարարի հավելյալ ծրագրերի մասին, որոնք պետք է խթանեն աշխատաշուկան: Եթե դա տեղի ունենա, ապա այդ ժամանակ եվրոն մի փոքր թափ կառնի և մասնակիորեն կվերականգնի իր դիրքերը՝ մինչև 1.39 գնային մակարդակը: Իսկ եթե հայտարարություն չհնչի, դոլարը կշարունակի արժևորվել եվրոյի նկատմամբ՝ մինչև ընդհուպ 1.34 գնային մակարդակը»,- նշեց վերլուծաբանը:
