Մինչև վերջին ժամանակներս Մեծ Բրիտանիայի բուժանձնակազմը աշխատանքի վայրում կարող էր կրել հայտնի ռեզինե Crocs կոշիկները: Սակայն ամեն ինչ փոխվել է այն բանից հետո, երբ փորձաքննությունն այն համարել է վտանգավոր: Այս մասին գրում է The Telegraph-ը:
Ինչպես հայտնում են մասնագետները, այն կարող է հարմարավետ լինել և հեշտ է լվացվում, օրինակ` արյունից, սակայն ընդունակ չէ պաշտպանել ոտքը բժշկական այնպիսի գործիքներից, ինչպիսիք են հերձադանակը, ասեղը կամ մկրատը: Իսկ այդ գործիքների հետ կլինիկաների անձնակազմն ամեն րոպե առնչություն է ունենում: Արգելքը բողոքի մեծ ալիք է առաջացրել բուժքույրերի շրջանում, քանի որ նրանք տարիներ շարունակ կրել են այդ կոշիկները:
Պետք է նշել, որ նմանատիպ արգելք արդեն գործում է ԱՄՆ-ում, Կանադայում, Շվեդիայում և Ավստրիայում: Այդտեղ բուժանձնակազմը պարտադիր պետք է կրի ամբողջությամբ փակ կոշիկներ: Իշխանավորները պնդում են, որ կոշիկը բուժաշխատողների համազգեստի մասն է, այդ իսկ պատճառով անվտանգության հարցը առաջնահերթ է: Իսկ հիվանդանոցում աշխատանքը կապված է որոշակի ռիսկերի հետ և պահանջում է մեծ ուշադրություն: