Ուկրաինայի նախագահ Վիկտոր Յանուկովիչը, որը պաշտոնական այցով գտնվում էր Թուրքմենստանում, փորձել է հերթական քայլն անել Ռուսաստան-Ուկրաինա գազային պարտիայում: Ինչպես նշում են ուկրաինական լրատվամիջոցները, Յանուկովիչի այս քայլը բավական հաջող է ստացվել: Աշգաբադում նա փորձել է գազային պայմանավորվածություններ ձեռք բերել թուրքմենների հետ:
Նշվում է, որ Թուրքմենստանը նույնպես դժգոհ է Մոսկվայի հետ հարաբերություններից, քանի որ ռուսները պայմանագիր էին ստորագրել Թուրքմենստանից տարեկան 70-80 մլրդ խորանարդ մետր գազ գնելու համար, սակայն գնում են միայն 11 մլրդ-ը: Սակայն նմանատիպ իրավիճակը, երբ 2009 թ. Տիմոշենկոյի կողմից ստորագրված պայմանագրով Ուկրաինան Ռուսաստանից պետք է գնի ավելի քան 30 մլրդ խորանարդ մետր գազ, սակայն չի պատրաստվում դա անել, ռուսական կողմում լուրջ դժգոհություն է առաջացնում: Ընդ որում, եթե Թուրքմենստանը հանկարծ պահանջի պայմանագրով սահմանված կարգով չգնված գազի դիմաց վճարել համապատասխան տուգանքներ, ապա «Գազպրոմը» շատ ավելի վատ վիճակում կլինի, քանի հիմա ինքն է փորձում գցել ուկրաինական կողմին:
Հիմա Թուրքմենստանը պատրաստ է Ուկրաինային վաճառել 40-50 մլրդ խորանարդ մետր, սակայն հարցն այն է, թե ինչպես այդ գազը կհասցվի Ուկրաինա, քանի որ Ուկրաինան և Թուրքմենստանը միմյանց կապող գազամուղ չկա: Այս պահին քննարկվում են մի քանի տարբերակներ, որոնցից են Ռուսաստանի տարածքով, Կասպից ծովի հատակով կառուցվելիք գազամուղով, ինչպես նաև Վրաստանի նավահանգիստներում կառուցվող հեղուկ գազի պահեստներից` լցանավերի միջոցով:
