Հայաստանի աշխատաշուկայում կադրերի ծերացում է նկատվում, և շատ մասնագիտությունների գծով կա որակյալ կադրերի պահանջարկ, հատկապես մետաղամշակման`խառատ, փականագործ, գործիքագործ, լուրջ պատրաստում չկա, և մնացել են խորհրդային տարիներին պատրաստված կադրերը: Ինչպես «Առաջին լրատվական»-ի հետ զրույցում նշեց Արդյունաբերողների և գործարարների միության գործադիր տնօրեն Էդուարդ Կիրակոսյանը, կադրերի դեֆիցիտ կա նաև շինարարության ոլորտում՝ կռունկավար, մեքենավար, ընդհուպ մինչև ծեփագործ վարպետ: Ըստ նրա՝ ուսումնական հաստատությունների կողմից քիչ են պատրաստվում նաև տեքստիլի գծով մասնագետներ:
«Կադրերի հասցեական պատրաստում չկա: Ընդհանրապես, խզում կա կադրերի պատրաստման և տնտեսության պահանջարկի միջև: Կարծես տարբեր հարթությունների վրա են գործում ուսումնական հաստատությունները և տնտեսության իրական հատվածը»,- ասաց Է. Կիրակոսյանը:
Նրա կարծիքով՝ կադրերի դեֆիցիտը ոչ թե աշխատուժի երկրից հեռանալու հետևանքով է, այլ այն բանի, որ կադրերի պատրաստումը չի բխում տնտեսության պահանջարկից. «Տնտեսությունն իր հերթին թերի է զարգացած և պատվեր չի տալիս կադրերի պատրաստման համար»:
Արաբական երկրների կողմից հայկական աշխատուժի նկատմամբ հետարքրության ավելացումը Է.Կիրակոսյանը դրական գնահատեց. «Բարձրագույն կրթությամբ որոշ կադրերի գերարտադրություն ունենք, օրինակ`բժիշկ, ուսուցիչ, հաշվապահ, տնտեսագետ, և եթե նրանց հնարավոր լինի աշխատանքի տեղավորել, ինչ վատ բան է»:
«Քանի որ շուկան դեռ չի ձևավորվել, պետությունը պետք է ուսումնասիրի, թե ինչ պահանջարկ կա և ուսումնական հաստատություներին պատվեր տա: Ուսուցման պլանները ներկայում կազմվում են ոչ թե ելնելով տնտեսության պահանջարկից, այլ նրանից, թե դիմորդներն ինչ մասնագիտություն են ընտրում, իսկ ինչպես գիտենք, կան մոդայիկ մասնագիտություններ` իրավաբան, հաշվապահ, տնտեսագետ, և նոր սերունդը հիմնականում ձգտում է սովորել այդ մասնագիտություններով, ու քանի որ երեխաներին ու նանց ծնողներին չեն բացատրում, որ այդ մասնագիտությունների պահանջարկը չունենք, ստեղծվել է այն իրավիճակը, որ կա»,- նշեց Է.Կիրակոսյանը՝ հավելելով, որ ամեն դեպքում արաբական երկրների կադրերի արտահոսքը մեծ չէ, որակ չի կազմի և մեր աշխատաշուկայի վրա որոշակի ազդեցություն չի ունենա:
