Նախագահը կբանակցի Կոնգրեսի հետ օգնության փաթեթը հաստատելու համար։
ԱՄՆ նախագահի ազգային անվտանգության հարցերով խորհրդական Ջեյք Սալիվանը կիրակի ասել է, որ Իսրայելի և Ուկրաինայի համար սպառազինության նոր փաթեթի արժեքը կկազմի ավելի քան 2 միլիարդ դոլար:
CBS-ի «Face the Nation»-ին տված հարցազրույցում Սալիվանն ասել է, որ նախագահ Ջո Բայդենն այս շաբաթ ինտենսիվ բանակցություններ կվարի Կոնգրեսի հետ՝ օգնության նոր փաթեթը հաստատելու վերաբերյալ:
Հարցին, թե արդյոք կպահանջվի 2 միլիարդ դոլար, Սալիվանը պատասխանեց. «Թիվը զգալիորեն ավելի մեծ կլինի, բայց, ինչպես ասացի, այն անպայման կներառի ռազմական տեխնիկա, որն անհրաժեշտ է Ուկրաինայի ազատությունը, ինքնիշխանությունը և տարածքային ամբողջականությունը պաշտպանելու համար, ինչպես նաև օգնություն Իսրայելին ինքնապաշտպանության համար ահաբեկչական սպառնալիքի դեմ պայքարում»։
Այն փաստը, որ Քևին Մաքքարթիի պաշտոնանկությունից հետո հանրապետականները դեռ չեն կարողացել ընտրել Ներկայացուցիչների պալատի նախագահին, հանգեցրել է օրինագծի ընդունման հետաձգմանը։
Մինչդեռ պետքարտուղարությունը հայտարարել է Մերձավոր Արևելյան շրջագայությունը շարունակող պետքարտուղար Էնթոնի Բլինքենի և Եգիպտոսի նախագահ Աբդել Ֆաթահ Էլ-Սիսիի հանդիպման մասին։
«Պետքարտուղարը և նախագահ Սիսին համաձայն են Գազայի հատվածում հումանիտար իրավիճակին անդրադառնալու կարևորության մասին՝ ապահովելու, որ օգնությունը հասանելի լինի այն մարդկանց, ովքեր դրա կարիքն ունեն և պաշտպանեն խաղաղ բնակիչներին տառապանքներից», – ասվում է փաստաթղթում:
Միևնույն ժամանակ, մի խումբ ամերիկացի սենատորներ մեկնում են Մերձավոր Արևելք՝ փորձելով խրախուսել Իսրայելին և Սաուդյան Արաբիային շարունակել բանակցությունները հարաբերությունների կարգավորման համար: Այս մասին NBC-ի Meet the Press-ի եթերում ասել է Հարավային Կարոլինայի սենատոր Լինդսի Գրեհեմը:
Գրեհեմն ընդգծել է, որ «առաջիկա օրերին» կմեկնի Սաուդյան Արաբիա և Իսրայել մի խումբ սենատորների հետ՝ կոչ անելով առաջընթաց գրանցել ԱՄՆ-ի կողմից աջակցվող համաձայնագրում այն բանից հետո, երբ «Համասի» զինյալների հարձակումն Իսրայելի վրա հանգեցրեց բանակցությունների տապալմանը:
