Վրացական GHN լրատվական գործակալության փոխանցմամբ՝ Վրաստանի արտգործնախարար Գրիգոլ Վաշաձեն անդրադարձել է Շվեյցարիայում տեղի ունեցած ռուս-վրացական բանակցությունների հերթական փուլին, ինչը նվիրված էր Առևտրի համաշխարհային կազմակերպությանը (ԱՀԿ) Ռուսաստանի անդամակցությանը.
«ԱՀԿ-ին անդամակցելու վերաբերյալ ռուս-վրացական հերթական բանակցություններն ավարտվեցին անարդյունք, ինչի պատճառը Ռուսաստանի համառությունն է։ Մենք Ռուսաստանի հետ բանակցություններում գնում ենք փոխզիջման, սակայն ռուսներն այնքան համառորեն են կանգնած, կարծես գտնվում են Բորոդինոյի դաշտում»։
Հիշեցնենք, որ Ռուսաստանը փորձում է ԱՀԿ-ին անդամակցել 1993 թվականից, ինչի վրա շարունակ վետո է դնում Վրաստանը։ 2008 թվականի օգոստոսին տեղի ունեցած ռուս-վրացական հնգօրյա պատերազմից հետո առաջին անգամ Ռուսաստանն ու Վրաստանն այս տարվա մարտի 10-ին Շվեյցարիայի Բեռն քաղաքում ԱՀԿ-ին Ռուսաստանի անդամակցության համար նստեցին բանակցությունների սեղանի շուրջ, ինչը, սակայն, ավարտվեց անարդյունք։
Վրացական կողմը շարունակ առաջ է քաշում աբխազական ու հարավօսական հատվածներում մաքսային անցակետերի օրինականացման հարցը։ Մինչդեռ ռուսական կողմն առաջարկում է այդ խնդիրը քննարկել ոչ թե իր, այլ Աբխազիայի ու Հարավային Օսիայի հետ։