Հայաստանի անվտանգության խորհրդի քարտուղար Արմեն Գրիգորյանին հոկտեմբերի 1-ին Թեհրանում ընդունել է Իրանի ազգային անվտանգության բարձրագույն խորհրդի քարտուղար, գեներալ Ալի-Աքբար Ահմադիանը:
Mehrnews.com-ը տեղեկացնում է, որ հանդիպմանը գեներալ Ահմադիանը մատնանշել է կովկասյան տարածաշրջանում վերջին զարգացումները և ընդգծել տարածաշրջանում խաղաղության և անվտանգության հաստատման համար յուրաքանչյուր կողմի ջանքերի անհրաժեշտությունը: «Տարածաշրջանի աշխարհագրության ցանկացած փոփոխություն հանգեցնում է անվտանգության բացակայության և անկայունության ու սրում է ճգնաժամը»,- ընդգծել է նա:
Ըստ աղբյուրի՝ պարզաբանելով Իրանի Իսլամական Հանրապետության հիմնարար և անփոփոխ քաղաքականությունը ՝ զարգացնելու իր հարևանների հետ համագործակցությունն ու փոխգործակցությունը և ստեղծելու մի տարածաշրջան, որը զերծ է ցանկացած տեսակի լարվածությունից և կոնֆլիկտներից, ԱԱԽ քարտուղարը հավելել է. «Տարածաշրջանի երկրների միջև թափանցիկ և կառուցողական երկխոսությունները հիմք են ստեղծում կայուն անվտանգության, հավասարակշռված զարգացման և բարգավաճման համար և տարածաշրջանի բնակիչների համար հարմարավետություն»։
«Իրանի Իսլամական Հանրապետությունը պատրաստ է անհրաժեշտ հիմք տրամադրել և հանդիպում անցկացնել տարածաշրջանի երկրների միջև»,- ասել է Ահմադիանը:
Ընդգծելով Իրանի Իսլամական Հանրապետության և Հայաստանի միջև տնտեսական փոխգործակցության և համագործակցության ակտիվացման, ինչպես նաև երկկողմ առևտրային փոխանակումների ավելացման անհրաժեշտությունը՝ նա հայտարարել է բոլոր ոլորտներում հարաբերությունների մակարդակը բարձրացնելու Իրանի պատրաստակամության մասին:
Նշվում է, որ Հայաստանի անվտանգության խորհրդի քարտուղարն իր հերթին մատնանշել է երկու երկրների միջև վաղեմի հարաբերությունները և հայտարարել Իրանի Իսլամական Հանրապետության հետ հարաբերությունների համակողմանի զարգացման Հայաստանի պատրաստակամության մասին:
Մատնանշելով Իսլամական Հանրապետության արդյունավետ դերակատարությունը կովկասյան տարածաշրջանում խաղաղության և կայունության հաստատման գործում ՝ Գրիգորյանը կոչ է արել շարունակել Իրանի դերակատարությունն այդ հարցում:
Նա նաև կարևորել է երկու երկրների միջև տնտեսական, առևտրային և արդյունաբերական նախագծերը և կարևորել դրանց շուտափույթ իրականացումը:
