Սեպտեմբերի 28-ին «Le Figaro magazine» պարբերականի փոխտնօրեն Ժան-Քրիստոֆ Բյուիսոնը X սոցիալական ցանցի իր միկրոբլոգում հանդես էր եկել հրապարակմամբ՝ կոչ անելով Ֆրանսիայի իշխանություններին Լեռնային Ղարաբաղի ժողովրդի դեմ Ադրբեջանի գործած հանցագործություններին ի պատասխան անհապաղ ձեռնարկել հետևյալ քայլերը․ Ադրբեջանի դեսպանին հրավիրել Ֆրանսիայի ԱԳՆ, բռնագրավել Ֆրանսիայում գտնվող և Ալիևներին պատկանող ունեցվածքը, կասեցնել Ֆրանսիա-Ադրբեջան քաղաքական, առևտրային կամ մշակութային բարեկամական խմբերը, դադարեցնել ադրբեջանական ապրանքների ներկրումը Ֆրանսիա։
Ֆրանսիայի Ազգային ժողովում իշխող կուսակցության «Վերածնունդ» խմբակցության պատգամավոր Աստրիդ Փանոսյանը ողջունել էր Ժան-Քրիստոֆ Բյուիսոն կոչը և Ֆրանսիայի Ազգային ժողովում և Սենատում Ֆրանսիա-Ադրբեջան բարեկամական խմբերի անդամ խորհրդարանականներին կոչ էր արել դուրս գալ այդ խմբերից։
Նույն օրը «Վերածնունդ» խմբակցության նախագահ Սիլվեն Մայարը հայտարարեց, որ իր ղեկավարած խմբակցության պատգամավորները չեն կարող լռել Լեռնային Ղարաբաղի բնակչությանը բաժին հասած ողբերգության առջև և Ազգային ժողովի Ֆրանսիա-Ադրբեջան բարեկամական խմբի անդամ՝ «Վերածնունդ» խմբակցության պատգամավորները դուրս են գալիս այդ խմբից։ Խմբից դուրս գալու վերաբերյալ արված համատեղ հայտարարության մեջ նշված պատգամավորներն իրենց լիակատար աջակցությունն են հայտնել Հայաստանին և հայ ժողովրդին։
Դրան հաջորդեց Ֆրանսիայի Ազգային ժողովի Ֆրանսիա-Ադրբեջան բարեկամական խմբի նախագահ, «Հանրապետականներ» խմբակցության պատգամավոր Պիեռ Վատենի հայտարարությունն այն մասին, որ Ֆրանսիա-Ադրբեջան բարեկամական խումբը կասեցնում է իր գործունեությունը և դադարեցնում է հարաբերությունները Ադրբեջանի խորհրդարանի Ադրբեջան-Ֆրանսիա բարեկամական խմբի հետ։
Համաձայն Ֆրանսիայի Սենատից ստացված տեղեկությունների՝ համանման գործընթաց է սկսվել նաև Սենատում։
