Ռուսաստանի արտգործնախարար Սերգեյ Լավրովը «Գոլոս Ռոսիի» ռադիոկայանին տված հարցազրույցում ասել է, որ ԵԱՀԿ-ի միջնորդների առջև խնդիր է դրվել նախապատրաստել հակամարտության վերաբերյալ հայտարարություն, որի տակ Աստանայում կստորագրեն հակամարտության կողմերը և ՄԽ համանախագահները: Անդրադառնալով այդ հայտարարությանը՝ փորձագետ-քաղաքագետ Մանվել Սարգսյանը նկատեց, որ եթե մի փաստաթղթի տակ այդքան մարդ պիտի ստորագրի, ապա այն կլինի շատ ընդհանուր մի փաստաթուղթ. «Մեդվեդևն էլ շատ հանգիստ ասաց, որ պետք է փորձել ինչ-որ ընդհանուր սկզբունքներ գտնել բոլոր կոնֆլիկտները լուծելու համար, ինչը, իմ տպավորությամբ, նշանակում է սկզբունքների բացակայություն: Իհարկե, ԵԱՀԿ անդամ երկրները կընդգծեն, որ պետք է բանակցությունները շարունակել և խնդիրը լուծել խաղաղ ճանապարհով, սակայն արդյունքի հասնելու համար Ադրբեջանը պետք է ճանաչի մադրիդյան սկզբունքներում ամրագրված ամենաէական սկզբունքներից մեկը` Ղարաբաղի ժողովրդի ինքնորոշման իրավունքը»:
Սարգսյանի գնահատմամբ, Ադրբեջանն այսօր պատրաստ չէ ճանաչել այդ սկզբունքը, Իլհամ Ալիևն էլ օր առաջ հայտարարել է, որ այդ սկզբունքն իրենց համար անընդունելի է. «Եթե անընդունելի է, էլ ինչի՞ մասին կարելի է խոսել: Կարելի է խոսել ընդամենը միջազգային հանրության դիրքորոշման մասին, որը չի ընդունում ռազմական ճանապարհով հարցի լուծումը, բայց դրանից զատ նա էլ ուրիշ բան չի ընդունում: Բոլորն անխտիր գիտեն, որ Ադրբեջանի կողմից եղել է ագրեսիա, և խախտվել են Ղարաբաղի ժողովրդի իրավունքները, սակայն այդ մասին ոչ ոք չի խոսում»:
Նման մթնոլորտում, ըստ Մանվել Սարգսյանի, բանակցությունները կարող են արդյունք տալ միմիայն միջազգային հանրության ինչ-որ քայլերի հետևանքով, սակայն միջազգային հանրության հայտարարությունները քաղաքականություն չեն դառնում. «ՄԱԿ-ի գլխավոր քարտուղարը կոչ արեց կողմերին դիպուկահարներին հետ քաշել շփման գծից, սակայն մինչ այժմ ոչ մի գործ այդ ուղղությամբ չի արվել»:
Մանվել Սարգսյանը նկատեց, որ Ֆրանսիայի և ԱՄՆ-ի նախագահների բացակայությունը ցույց է տալիս, որ Մեդվեդևին քարտ բլանշ է տրված, և Աստանայի գագաթնաժողովը լինելու է նրա բենեֆիսը: Սակայն, ըստ քաղաքագետի, եթե ևս մեկ անգամ նշվի, թե կողմերը իրենք պետք է գտնեն լուծման ճանապարհը, կնշանակի, որ կողմերը երբեք չեն գա համաձայնության. «Եթե մենք իսկապես ուզում ենք հանգել լուծման, ապա պետք է փոխենք այն միջազգային մթնոլորտը, որը 17 տարի գոյություն ունի. այդ մթնոլորտում համաձայնության գալ հնարավոր չէ»:
