Այսօր «Ուրբաթ» ակումբում հյուրընկալված «Սարդարապատ» շարժման նախաձեռնող խմբի անդամ Ժիրայր Սեֆիլյանն, անդրադառնալով ՀԱԿ-ի վերջին հանրահավաքին, ասաց, որ ինքը հունվար-փետրվարից նշել է, թե այժմյան գործընթացն օգուտ է տալիս իշխանություններին, իրավիճակի տերն անձամբ Սերժ Սարգսյանն է, ով ձգտում է ունենալ վերահսկելի ընդդիմություն և իրականացնում է դա որպես «գլխավոր դիրիժոր»:
Սեֆիլյանը նշեց, որ առաջիկա օրերին «ականատես կլինենք արհեստական լարումների թուլացմանը», իսկ ընտրություններից առաջ «ականատես կլինենք Կոնգրեսի փլուզմանը»: Նրա կարծիքով`ընտրությունները կլինեն այնպիսին, ինչպես էին 2007-ի ընտրությունները, այսինքն` «փոշիացած քաղաքական դաշտ»: «Մենք լուծումը տեսնում ենք հետևյալ կերպ` փշրել կեղծող համակարգը, պետք է տապալվի այս ռեժիմը, պետք է լինի անցումային փուլ, և նախապատրաստվել ընտրությունների»:
Ժ.Սեֆիլյանը դարձյալ կոչ արեց համախմբվել «որակյալ անհատների» շուրջը, և նշեց, որ իրենք այդ ուղղությամբ հաջողություններ ունեն, և խոսքը վերաբերում է ոչ միայն երկրի ներսի, այլև սփյուռքի անհատներին, քանի որ այսօրվա սփյուռքը, ըստ նրա, նախկինը չէ: «Երբ որ այս իշխանությունների ժողովրդական հենքը վերացվի` ավելի հեշտ կլինի, մնացածը տեխնիկայի հարց է»,- նշեց նա:
