ՅՈՒՆԵՍԿՕ-ի Համաշխարհային ժառանգության կոմիտեն Իրանի պատմական քարավանատներն ընդգրկել է համաշխարհային ժառանգության իր հեղինակավոր ցանկում: Այս մասին հաղորդում է IRNA գործակալությունը։
Ըստ հաղորդագրության՝ սեպտեմբերի 17-ին Սաուդյան Արաբիայի մայրաքաղաք Էր Ռիադում տեղի ունեցած ՅՈՒՆԵՍԿՕ-ի Համաշխարհային ժառանգության կոմիտեի 45-րդ նստաշրջանում քարավանատները մանրակրկիտ կերպով ուսումնասիրվել են, Իրանի 24 նահանգներում գտնվող 54 պատմական քարավանատներ ընտրվել և ներառվել են Համաշխարհային ժառանգության ցանկում։
Այս որոշմամբ հարյուրավոր քարավանատներից մանրակրկիտ կերպով ընտրված 54 քարավանատները պաշտոնապես դարձել են Իրանի 27-րդ նյութական մշակութային ժառանգությունը, որ գրանցված է ամբողջ աշխարհում:
«Քարավանատներն իրենցից ներկայացնում էին ճամփեզրի իջևանատներ, որոնք սնունդ ու ջուր էին մատակարարում քարավաններին, ուխտավորներին և այլ ճանապարհորդներին: Երթուղիները և քարավանատների գտնվելու վայրը որոշվել են ջրի առկայությամբ, աշխարհագրական պայմաններով և անվտանգության նկատառումներով», – ասվում է ՅՈՒՆԵՍԿՕ-ի Համաշխարհային ժառանգության կոմիտեի կայքում։
