Հայ-ադրբեջանական սահմանին Բաքվի զինուժի և տեխնիկայի կուտակման և լարվածության աճի մասին Երևանի պաշտոնական ահազանգերի ֆոնին, ԱՄՆ պետքարտուղարի Եվրոպայի ու Եվրասիայի հարցերի տեղակալի պաշտոնակատար Յուրի Քիմը հեռախոսազրույցներ է ունեցել Հայաստանի և Ադրբեջանի արտաքին գործերի նախարարների հետ: Նրանք, հիշեցնեմ, նախ քառօրյա բանակցություն են ունեցել Վաշինգտոնում՝ մայիսի սկզբին, հետո հունիսի վերջին ունեցել են եռօրյա բանակցություն: Այդ ամենից երկու-երեք ամիս անց իրավիճակը Հայաստան-Ադրբեջան սահմանին մոտեցել է ոչ թե խաղաղությանը, այլ փաստացի նոր պատերազմին, համենայն դեպս դատելով այն հայտարարություններից, որ արդեն մի քանի օր է անում է պաշտոնական Երևանը՝ ընդհուպ վարչապետ Փաշինյանի մակարդակով:
Հայաստանն ահազանգում է, որ Ադրբեջանը կուտակումներ է անում սահմանին: Երևանը կոչ է անում միջազգային հանրությանը ձեռնարկել քայլեր և թույլ չտալ պայթյուն: Հարց է առաջանում, թե Վաշինգտոնի նախաձեռնությամբ մայիսին և հունիսին անցկացված, հետպատերազմյան շրջանի համար աննախադեպ ձևաչափերի հանդիպումներից, դրանց հաջորդած բրյուսելյան երկու՝ մայիսի 14-ի և հուլիսի 15-ի հանդիպումներից հետո ինչու՞ է Հայաստան-Ադրբեջան սահմանի իրավիճակը հասել այդպիսի կրիտիկական կետի: Թե՞ Վաշինգտոնն օրինակ կարող է համաձայն չլինել այդ գնահատականին, համարելով, որ Ադրրբեջանի՝ պատերազմ սկսելու վտանգը մեծ չէ, կամ առնվազն այնքան չէ, որքան ահազանգում է Երևանը: Միաժամանակ, սահմանին լարվածության աճի մասին հայտարարել է նաև ԵՄ դիտորդական առաքելությունը, հայտնելով, թե ավելացնում են դիտակետերը:
Թե՞ նրանք էլ ավելացնում են, կասկածելով Երևանի գնահատականին, որովհետև լարվածության աճի մասին խոսելով, նրանք սակայն չեն խոսել կուտակումների մասին: Հարցերը բնականաբար շատ են, այդ թվում և այն, թե ինչ են խոսել Յուրի Քիմն ու Արարատ Միրզոյանը, և Քիմն ու Բայրամովը: Հատկապես, երբ երկու օր առաջ էլ Ալիևի հետ խոսել էր Քիմի անմիջական ղեկավարը՝ պետքարտուղար Բլինքենը, որը սակայն, մինչ այսօր հեռախոսազրույց չի ունեցել Նիկոլ Փաշինյանի հետ, ինչը սովորաբար տեղի է ունենում՝ այսպես ասած հավասարակշռությունը պահելու համար: Թե՞ Բլինքենը Նիկոլ Փաշինյանին կզանգահարի Քիմի և Միրզոյանի հեռախոսազրույցի արդյունքում: Բոլոր դեպքերում առաջանում է հարց՝ սահմանի իրավիճակի վերաբերյալ Երևանի գնահատականներն ու ահազանգերը խոսում են մայիսից մեկնարկած, ԱՄՆ հովանու ներքո ինտենսիվ դիվանագիտական գործընթացի տապալմա՞ն, դրա եզրին հայտնվելու՞ մասին, թե «ըստ չվացուցակի» ընթացքի:
