Ադրբեջանական Salam News գործակալության փոխանցմամբ՝ ԵՄ-ը հաստատել է Եվրահանձնաժողովի մանդատը՝ «Անդրկասպյան» գազամուղի համաձայնագրի նորմատիվային-իրավական բազայի ստեղծման վերաբերյալ Թուրքմենստանի և Ադրբեջանի հետ բանակցություններ վարելու համար։
ԵՄ-ի այս որոշումը ողջունվել է Nabucco Gas Pipeline International GmbH ընկերության գլխավոր տնօրեն Ռեյնհարդ Միտչեկի կողմից։ Վերջինս նկատել է, որ Եվրահանձնաժողովի նախաձեռնությունը համապատասխանում է իրենց ծրագրերին.
«Բազմաթիվ ֆինանսական աղբյուրների ներգրավումից հետո Nabucco-ն կախված չի լինի «Անդրկասպյան» խողովակաշարի պոտենցիալ կառուցումից։ Չնայած դրան՝ Կասպյան գազի արտահանման մեծ պոտենցիալն ունի կարևոր նշանակություն՝ ապագա եվրոպական ու թուրքական շուկաների տեսանկյունից։ Nabucco-ն Եվրոպայի՝ Կասպյան գազին առնչվող ամենամրցունակ նախագիծն է»։
Հիշեցնենք, որ «Անդրկասպյան» գազատարը թուրքմենական գազը Կասպից ծովի միջով հասցնելու է Ադրբեջան, այնտեղից էլ Nabucco գազատարով, ադրբեջանական գազի հետ մեկտեղ, Թուրքիայի տարածքով ուղղվելու է դեպի Եվրոպա։
