Ռազմավարական և ազգային հետազոտությունների հայկական կենտրոնի փորձագետ Սարո Սարոյանը, այսօր մեզ հետ զրույցում արձագանքելով այն հարցին, թե ՀԱԿ հանրահավաքը և ներուժը հանրահավաքային ալիքով բավակա՞ն է արտահերթ ընտրությունների հասնելու համար, ասաց. «Այստեղ, ըստ իս, կարևոր է ոչ թե հանրահավաքի մասնակիցների թիվը, այլ ընդհանուր հասարակական տրամադրվածությունների հանգամանքը: Իսկ հասարակական տրամադրվածությունները շատ-շատ վաղուց բավարար են, որպեսզի Հայաստանում հեղափոխական իրավիճակ ստեղծվի»:
Սարո Սարոյանի խոսքերով՝ երբ հասարակությունը համոզվի, որ տվյալ քաղաքական ուժը իսկապես գնում է այդ ճանապարհով, կհամախմբվի այդ քաղաքական ուժի շուրջը: «Այսինքն՝ դա ոչ թե հանրահավաքի ժամանակ կերևա, այլ երբ ներքին համոզում ունենա, որ տվյալ քաղաքական ուժը գնում է նման կարգի արմատական փոփոխությունների, ինչը նախորդ ամիսներին ՀԱԿ-ը ցույց չի տվել: Հետևաբար, այստեղ հանրահավաքի մասնակիցների թիվը, իմ կարծիքով, բացարձակապես կապ չունի»,- եզրափակեց Սարո Սարոյանը: