Թուրքական Dunya bulteni կայքի փոխանցմամբ՝ Թուրքիայի արտգործնախարար Ահմեդ Դավութօղլուն երեկ հայտարարել է, որ Թուրքիայի վարչապետ Էրդողանն այսօր մեկնարկող իր եգիպտական այցի շրջանակներում չի այցելելու Գազայի հատված։
Ըստ Դավութօղլուի՝ Էրդողանի արտասահմանյան շրջագայությունը սահմանափակվում է Եգիպտոսով, Լիբիայով և Թունիսով։
Հիշեցնենք, որ ավելի վաղ նշվում էր, թե Էրդողանը Գազայի հատված է մտնելու եգիպտական «Ռաֆահ» անցակետով։ Սակայն Եգիպտոսը, ելնելով ազգային անվտանգության նկատառումներից, մերժել է թուրքական կողմի խնդրանքը՝ հայտարարելով, որ դեռևս լիովին չի ապահովել «Ռաֆահ» անցակետի անվտանգությունը։
Իսկ Անկարայում Իսրայելի նախկին դեսպան Ալոն Լիելը բրիտանական The Independent պարբերականին տված հարցազրույցի ժամանակ հայտարարել էր, որ ԱՄՆ-ն և Իսրայելը ձեռնարկում են հնարավոր ամեն ինչ՝ կանխելու համար դեպի Գազայի հատված Թուրքիայի վարչապետ Էրդողանի այցը.
«Եթե Էրդողանը մտնի Գազայի հատված, ապա նրան կդիմավորեն՝ ինչպես աստծու։ Եթե եգիպտացիները Էրդողանին թույլ տան «Ռաֆահ» անցակետով մտնել Գազա, ապա Իսրայելի և Եգիպտոսի հարաբերություններում կսկսվի նոր ժամանակաշրջան։ Դա դրամատիկ փոփոխություններ կմտցնի տարածաշրջանային դիվանագիտության մեջ»։
