Ռուսական Regnum լրատվական գործակալության փոխանցմամբ՝ Վրաստանի ոստիկանությունը ձերբակալել է Թուրքիայի քաղաքացի Մահմուդ Քութարին՝ նրան մեղադրելով արագությունը գերազանցելու և վթարային իրավիճակ առաջացնելու մեջ։ Թուրք վարորդի պատճառով խոշոր վթար է տեղի ունեցել Վրաստանի արևմուտքում, ինչի արդյունքում զոհվել է 7 մարդ։ Տուժել են տասնյակ անձինք։
Դեպի Բաթում մեկնող թուրք վարորդն իր Ford ջիպով մխրճվել է Բաթումից Թբիլիսի գնացող միկրոավտոբուսի մեջ։ Միկրոավտոբուսի 7 ուղևորներ ստացած վնասվածքներից ու վերքերից տեղում մահացել են։ Եվս 9 ուղևորներ տեղափոխվել են Բաթումի և Փոթիի հիվանդանոցներ։ Նրանցից 3-ի վիճակը գնահատվում է ծանր։ Միկրոավտոբուսի բոլոր տուժյալները Վրաստանի քաղաքացիներ են։
Թուրքիայի քաղաքացու ավտոմեքենայում գտնվել է նրա ընտանիքը՝ երկու երեխաներն ու կինը, երեքն էլ գտնվում են հիվանդանոցում։ Նրանց վիճակը գնահատվում է ծանր, սակայն կյանքին վտանգ չի սպառնում։
Ջիպի և միկրոավտոբուսի բախումից հետո նրանց է բախվել Երևանից Թուրքիա մեկնող ավտոբուսը, ինչի արդյունքում տուժել են նրանում գտնվող մի քանի մարդ։ Դեպքի վայր ժամանած բժիշկները նրանց տեղում բուժօգնություն են ցուցաբերել, սակայն չեն հոսպիտալացրել։
Թուրքիայի քաղաքացի Մահմուդ Քութարը ձերբակալված է, տարվում է հետաքննություն։
