Բաթումում ավարտվեց «Golden Talent 2011» միջազգային երաժշտական մրցույթի հիմնական մասը։ Հայաստանը երկրորդ տեղում է, առաջին տեղում է Վրաստանը, իսկ երրորդում՝ Մոլդովան։
«Golden Talent 2011» -ի առաջին օրը մասնակիցները կատարել էին համաշխարհային ճանաչում ունեցող երգեր, երկրորդ օրն՝ իրենց երկրներում հայտնի հիթեր։
Այսօր առաջինը ելույթ ունեցավ Էստոնիայի ներկայացուցիչը, երկրորդը՝ Հայաստանը ներկայացնող Լիլիթ Հովհաննիսյանը, որից հետո Բուլղարիայի, Վրաստանի, Ադրբեջանի և մի շարք այլ երկրների ներկայացուցիչներ։
Լիլիթ Հովհաննիսյանն կատարեց Կոմիտասի «Էս գիշեր» երգը։ Նա մրցույթի միակ մասնակիցն էր, ով ելույթ ունեցավ առանց նվագակցության։
18 մասնակիցներից հաղթողները հայտնի կդառնան միայն վաղը՝ փակման հանդիսավոր արարողության ժամանակ, երբ կամփոփվեն նաև հանդիսատեսի քվեարկության արդյունքները, և այդ միավորները կգումարվեն ժյուրիի գնահատականներին։
