ՀԱԿ հաջորդ հանրահավաքն ավելի արդյունավետ կլինի: Այսօր «Առաջին լրատվականի» հետ զրույցում կանխատեսեց քաղաքագետ Հրանտ Մելիք-Շահնազարյանը` խոսելով սեպտեմբերի 9-ի ՀԱԿ հանրահավաքի մասին:
«Ուրբաթ օրը կայացած հանրահավաքի ամենահիմնական պատճառն այն էր, որ ՀԱԿ-ը բացատրեց այն ընդմիջումը, որը տեղի ունեցավ, և որի ընթացքում քաղաքական նոր զարգացումներ եղան, մասնավորապես՝ ՀԱԿ-իշխանական կոալիցիա երկխոսությունը»,- մեկնաբանեց քաղաքագետը:
Նրա կարծիքով`հասարակության շրջանում ինչ-որ սպասողական իրավիճակ էր: «Հասարակությունը իրավիճակի փոփոխության ակնկալիք ուներ. հույս ուներ հանրահավաքում տեսնել այն իրադարձությունների արդյունքը, որոնք տեղի ունեցան ամառվա ընթացքում: Բայց եթե դիտարկենք հանրահավաքի պարունակությունը, ապա պետք է ասեմ, որ տարբերությունը բովանդակային առումով շատ չէր գարնան և ամառվա հանրահավաքների շարքից»,- նշեց Հ. Մելիք-Շահնազարյանը` կարծիք հայտնելով, որ այս անգամ գուցե որոշ չափով հուսախաբ եղան մարդիկ, որովհետև նորություններ չեղան:
Քաղաքագետի փաստմամբ` հիմնական շեշտադրումները դրվեցին հոգեբանական զարգացումների վրա` կապված բանակում տեղի ունեցած սպանությունների հետ, և կարծես իրավիճակային փոփոխություն, այնուամենայնիվ, չեղավ:
Անդրադառնալով քաղաքական հետագա զարգացումներին` Հ. Մելիք-Շահնազարյանը նշեց, որ նախընտրական շրջան է և պետք է քաղաքական ուժերը ջանք չխնայեն հնարավորինս շատ ընտրազանգված իրենց կողմը գրավելու համար: «Պարզ է, որ բոլորը կակտիվացնեն իրենց քարոզչությունը նաև, կոպիտ ասած, ոչ արդար քարոզչության միջոցներով, և կզգացվի այդ քաղաքական պայքարի շունչը»,- ասաց քաղաքագետը` դժվարանալով կանխատեսումներ անել, թե որ ուղղությամբ կընթանան քաղաքական զարգացումները:
«Մինչ օրս շատ ակտիվ գործում է միայն ընդդիմությունը, այնինչ իշխանական ուժերը կածես թե վաղ են համարում պայքարի մեջ մտնել, բայց այնուամենայնիվ ինձ համար հետաքրքիր է, թե հետագայում ինչ կլինի՝ թե՛ հանրապետականների դիրքորոշումը, թե՛ «Բարգավաճ Հայաստան» կուսակցության պահվածքը, որի դիրքորոշումից, իմ կարծիքով, շատ բան պարզ կլինի քաղաքական զարգացումների համար»,- իր խոսքը եզրափակեց քաղաքագետը:
