Օրերս Չինաստանին պատուհասած «Դոքսուրի» թայֆունի հետևանքով մի քանի շրջաններում մոլեգնել են տեղատարափ անձրևներ։ Ամբողջ երկրում տարհանվել են հարյուր հազարավոր մարդիկ, այդ թվում՝ տասնյակ հազարավոր մարդիկ՝ Պեկինում, որտեղ վերջին երեք օրվա ընթացքում հեղեղումների հետևանքով զոհվել է 11 մարդ, ևս 27-ը համարվում է անհայտ կորած։
Ինչպես տեղեկանում է Xinhua գործակալությունից, այդ առնչությանբ Չինաստանի նախագահ Սի Ծինփինը երկրի իրավասու գերատեսչություններից պահանջել է առավելագույն ջանքեր գործադրել՝ հեղեղումների գոտում մարդկային կյանքերը փրկելու համար։
«Անհրաժեշտ է, որ տարածաշրջանները հնարավոր բոլոր ջանքերը գործադրեն՝ փրկելու անհայտ կորածներին և մարդկանց, որոնք կտրված են արտաքին աշխարհից», – մեջբերում է գործակալությունը Չինաստանի ղեկավարի խոսքը։
Ինչպես նշել է Սի Ծինփինը, տեղի իշխանությունները պետք է տուժածներին ցուցաբերեն անհրաժեշտ բժշկական օգնությունը։ Բացի այդ, նա հիշեցրել է հեղեղումների հետևանքով զոհվածների հարազատներին աջակցության անհրաժեշտության մասին:
