Մարտի 1-ին սպանված Տիգրան Խաչատրյանի մայրը՝ Ալլա Հովհաննիսյանը, այսօր մեզ հետ զրույցում նկատեց, որ բոլորը ԵԽԽՎ Մոնիտորինգի հանձնաժողովի բանաձևի նախագծից մեջբերում են այն տողը, թե մարտի 1-ի էջը կարելի է փակված համարել: Նա այդ ամենը պայմանավորելով միտումնավորության հետ՝ մեզ հետ զրույցում չորս կետ առանձնացրեց.
«Ես գտնում եմ՝
1. Դա անհաջող թարգմանություն է, և այդ նախադասությունը կոնտեքստից դուրս վերցնելը մեր իշխանությունների ձեռքի գործն է:
2. Այդ համազեկուցողների զեկույցը համաձայնեցված է իշխանավորների հետ:
3. Ֆիշերը, որը միակ համազեկուցողներից էր, որ եկավ ու մեզ հետ չհանդիպեց, իրավունք չուներ այդ հայտարարությունը անել:
4. Եթե իրենց երկրում այդպիսի սպանություն լիներ ու չբացահայտվեր՝ միայն նախագահի խոսքով, որ խոսք է տվել ուժեղացնել այդ հարցը և հավուր պատշաճի կատարել, էջը կհամարեի՞ն փակված:
Մարտի 1-ի էջը կարելի է փակել այն ժամանակ, երբ և՛ սպանողները, և՛ հրաման արձակողները, բոլորը պատասխանատվության ենթարկվեն սպանությունների համար: Իսկ մինչև այդ, իրենք մարտի 1-ի էջի մասին խոսելու իրավունք չունեն, առավել ևս եվրոպական կառույցները, որովհետև ես չեմ գտնում, որ այդ էջը իրենք պետք է փակեն: Այդ էջը պետք է փակենք մենք՝ ժողովուրդը, ծնողներս: Երբ արդեն կզգանք, որ արդեն բոլոր բացահայտումները կատարված են, իսկ մեղավորները պատժված, նոր էջը կհամարենք փակված:
Մենք միանշանակ մեր բողոքի գործողությունները կուղղենք այդ բանաձևի դեմ և կհորդորենք պատգամավորներին, որ չընդունեն այդ նախագիծը»:
