Թուրքիայում ՆԱՏՕ-ի ռադիոտեղորոշման կայանի տեղակայումը լարվածություն կստեղծի տարածաշրջանում: Այսօր լրագրողների հետ հանդիպման ժամանակ նման տեսակետ հայտնեց թուրքագետ Լևոն Հովսեփյանը` խոսելով Թուրքիայում ՆԱՏՕ-ի ռադիոտեղորոշման կայանի տեղակայման հետևանքով առաջացած աշխարհաքաղաքական գործընթացներից:
«Անկարան ՆԱՏՕ-ի անդամ պետություն է և պարտավորություններ ունի կառույցի նկատմամբ, բայց այդ կայանի տեղակայմամբ ահռելի կավելանա Թուրքիայի հրթիռային պաշտպանությունը»,- մեկնաբանեց Լ. Հովսեփյանը` հավելելով, որ այս քայլով մեծ լարվածություն կառաջանա նաև տարածաշրջանում, մասնավորապես՝ Ռուսաստանում, Իրանում, Իսրայելում, Վաշինգտոնում: Նա նաև տեղեկացրեց, որ ռադիոտեղորոշման կայանները մեծ հնարավորություններ ունեն և սպառնում են նաև Ռուսաստանի հարավին, այդ իսկ պատճառով Ռուսաստանը և Իրանը հայտնեցին իրենց մտահոգությունը: «Ռուսաստանը նաև երաշխիքներ պահանջեց ՆԱՏՕ-ից, քանի որ կայանները չեն ապահովի տարածաշրջանի անվտանգությունը»,- նշեց Լ. Հովսեփյանը:
Համատեղ ասուլիսի ընթացքում ռազմական փորձագետ Արծրուն Հովհաննիսյանն ասաց, որ Թուրքիան չի ունեցել և միշտ ցանկացել է ձեռք բերել ցանկալի հրթիռային և օդային բաղադրիչ, այդ պատճառով սա շատ դրական քայլ է նրանց տեսանկյունից: «Այս կայանների տեղակայումը մրցավազք կառաջացնի տարածաշրջանում»,- նման տեսակետ հայտնեց ռազմական փորձագետը:
Այս ենթատեքստում անդրադառնալով հայ-թուրքական հարաբերություններին` բանախոսները նշեցին, որ սրանք աշխարհաքաղաքական գործընթացներ են և պետք չէ կապել հայ-թուրքական հարաբերությունների հետ: «Իհարկե, սա որոշակի լարվածություն կստեղծի նաև Հայաստանում, քանի որ Հայաստանն այս տարածաշրջանում է, բայց սա հատուկ հայ-թուրքական հարաբերություններին ուղղված քայլ չէ»,- մենաբանեց թուրքագետը:
