«Թալիբան» իսլամիստական խմբավորման պակիստանյան թևի ներկայացուցիչները հայտարարել են, որ նախապատրաստում են օպերացիա, որը թույլ կտա ազատել Ուսամա բեն Լադենի ընտանիքի անդամներին, որոնք ձերբակալվել են մայիսի 2-ին «թիվ մեկ» ահաբեկչի դեմ իրականացված ամերիկյան օպերացիայից հետո: Այս մասին Reuters գործակալությանը տված հարցազրույցում ասել է Պակիստանի ՆԳ նախարար Ռահման Մալիքը:
Նա տեղեկացրել է, որ թալիբները պատրաստվում են պատանդ վերցնել Պակիստանի բարձրաստիճան ղեկավարների, որոնց կփոխանակեն Բեն Լադենի ընտանիքի անդամների հետ: Մալիքն ասել է նաև, որ այս տեղեկությունը ստանալուց հետո երկրի իրավապահները խստացրել են անվտանգության միջոցառումները:
Հիշեցնենք՝ մայիսի 2-ին Ուսամա բեն Լադենին սպանելուց հետո այնտեղ գտնվող նրա կանայք ձերբակալվել են պակիստանյան հատուկ ծառայությունների կողմից: Պակիստանի իշխանությունները պնդում էին, որ Բեն Լադենի կանայք արտաքսվելու են երկրից, բայց քանի որ ստեղծվել էր կառավարական հանձնաժողով, որը պետք է քններ «Ալ-Քաիդայի» առաջնորդի սպանությունը, ապա որոշում էր կայացվել արտաքսումը հետաձգել:
